Dünyada işsizlərin sayı 2023-cü ildə 3 milyon artaraq 2020-ci ildən bəri ilk dəfə olaraq 208 milyona çatacaq. Bu haqda Beynəlxalq əmək təşkilatının (BƏT) proqnozuna istinadən RİA Novosti agentliyi yazıb.
Bu, dünya üzrə 5,8 faizlik işsizlik səviyyəsinə uyğundur. “Qlobal iqtisadiyyatdakı hazırkı tənəzzül daha çox işçini keyfiyyətsiz, aşağı maaşlı, qeyri-stabil və sosial müdafiəsi olmayan işlərə məcbur edə bilər” – BƏT-in proqnozlaşdırılmasında belə deyilir.
Hesabatda qeyd olunur ki, Avropa və Mərkəzi Asiya regionu Ukraynadakı müharibənin iqtisadi təsirindən xüsusilə ağır zərbə alıb. BƏT-in həmçinin başqa bir hesablamasına görə, dünyada hər işsiz kişiyə iki işsiz qadın düşür. Qlobal miqyasda qadınların məşğulluq səviyyəsi 2022-ci ildə kişilər üçün 72,3 faizlə müqayisədə 47,4 faiz təşkil edib. Mütəxəssislər onu da əlavə ediblər ki, 15-24 yaş arası gənclər arasında işsizlik nisbəti böyüklərdən üç dəfə çoxdur.
