İşə qəbul üzrə mütəxəssis İlqar Valinurov hesab edir ki, ixtisassız kadrlara 2022-ci ildə tələbat artacaq. O, əmək bazarında ən böyük tələbatın kuryerlərə, taksi sürücülərinə və satıcılara olacağını proqnozlaşdırıb.
Valinurov qeyd edib ki, əmək bazarının köklü şəkildə dəyişəcəyini gözləməyə dəyməz. Cəmiyyətin müəyyən kadrlara ehtiyacı illər ərzində yaranır. Lakin bəzi trendləri izləmək mümkündür.
Xüsusilə, işə qəbul üzrə bir agentlik qrupunun sahibinin fikrinə görə, satışla əlaqəli peşələr 2022-ci ildə aktual olacaq. Bunlara o, reklam və marketinq sahəsində mütəxəssisləri aid edib. Valinurov hesab edir ki, bu ixtisaslar üzrə vakant yerlər iş təkliflərinin yarısına qədərini təşkil edəcək.
Valinurovun proqnozuna görə, ticarətin ardınca çatdırılma və logistika sektoru böyüməyə başlayacaq. “Bazarların sayı artır, istehsal həcmi də buna uyğun olaraq artır və bunların hamısının çatdırılmasını kimsə təmin etməlidir” – o, əlavə edib.
Bundan əlavə, taksi sürücülərinə tələbat yenə də yüksək olaraq qalacaq, əmək bazarı mütəxəssisi belə hesab edir. Onun fikrincə, bu ona görə baş verir ki, insanlar tədricən öz avtomobillərinə qulluq etməkdənsə, daşıyıcıların xidmətlərindən istifadənin daha ucuz olduğunu anlamağa başlayıblar.
Bütün bunlarla yanaşı, əmək bazarında rəqəmsallaşma ilə əlaqəli insanlara ehtiyac yaranacaq. Bununla belə, Valinurov vurğulayıb ki, söhbət IT direktorlarından yox, strateji düşünməyi bacaran, rəqəmsal transformasiya ilə məşğul olmağa hazır olan və şirkətlər daxilində yeni yanaşmalar təklif edən insanlardan gedir.
“Söz açdığım tendensiyalarda məni narahat edən şey, qeyri-peşəkar kadrların sayının artımıdır. Yəni, həmin taksi sürücüləri əslində “robotlardır”, onlar avtomobili naviqator üzrə idarə edirlər, burada hansısa xüsusi ixtisas tələb olunmur. Əgər biz daha mürəkkəb vəzifələrdən, məsələn, əməliyyat direktorundan danışırıqsa, aydındır ki, belə vakansiyalar həmişə var. Ancaq sözügedən vakansiyalar kütləvi deyil, həmin mövqelər əmək bazarında taksi sürücüləri kimi eyni zamanda on minlərlə ola bilməz” – Valinurov sonda bunu qeyd edib.
