Vergilər Nazirindən daha bir xəbərdarlıq
“Bir sıra yerli və xarici şirkətlər qanunvericilikdəki boşluqlardan istifadə edərək vergilərdən yayınırlar”.
Bunu “Vergilər. Şəffaflıq. İnkişaf” adlı konfransda vergilər naziri Mikayıl Cabbarov bildirib.
Onun sözlərinə görə, bir sıra şirkətlər vergidən yayınma yollarını yaxşı bilən təcrübəli vergi məsləhətçilərini işə götürüblər:
“Bir sıra yerli və xarici şirkətlər qanunvericilikdə olan boşluqlardan və ya vergi orqanlarında informasiyanın müvəqqəti olmamasından sui-istifadə edərək vergidən yayınma hallarına yol verirlər. Bu şirkətlər vergidən yayınma yollarını yaxşı bilən təcrübəli vergi məsləhətçilərini, hüquqşunasları işə götürürlər. Onlar vergidən yayınan şirkətlərinin maraqlarını müdafiə edirlər. Bizim bu hallar barədə məlumatımız var və belə davranış davam edəcəyi təqdirdə, bir gün vergi müfəttişinin sizin qapınızı döyməsinə təəccüblənməməlisiniz.
“MARKETLƏR ÇEK VERMİR”
Əgər Siz hesab edirsiniz ki mən mübaliğə edirəm, yadınıza salın nə qədər şirkət tanıyırsınız ki, göstərdiyi xidmətin ödənişini xaricdə alır, nə qədər işçi tanıyırsınız ki, aldıqları əməkhaqqı rəsmiyyətə salınmayıb, getdiyiniz neçə supermarket və ictimai iaşə obyekti var ki, müştərilərinə fiskal kassa çekini vermir. Dövlətin, vətəndaşın və sahibkarın maraqları bir-birinə uyğun gəlməlidir. Qanunu eyni cür və bütün vergi ödəyicilərinə tətbiq etmədən qanunçuluğa əməl edilməsini və iqtisadiyyatının inkişafını təmin etmək mümkün deyil. Bazar iqtisadiyyatı şəraitində bazarın ayrı-ayrı iştirakçılarına seçmə yolu ilə verilən hətta ən kiçik güzəştlər bütün iqtisadiyyatın rəqabətliliyinə təsir göstərir və işğuzar aktivliyin rəsmi sahədən qeyri-rəsmi sahəyə keçidi ilə nəticələnir. Məhz buna görə bazar iştirakçıları üçün bərabər şərtlərin təmin edilməsi təkcə vergilər naziri və vergi işçiləri üçün deyil, hər bir vətəndaş üçün vacib olmalıdır. Məhz buna görə hər bir xərclədiyimiz manat leqal iqtisadiyyatda dövriyyə etməlidir”.
“Biz kəmiyyət etibarı ilə vergi yoxlamalarını azaldacağıq. Amma bu, o demək deyil ki, nəzarət zəifləyəcək”.
