Blog Full

Azərbaycan Mərkəzi Bankının (AMB) İdarə Heyəti “Ödəniş sistemlərinin iştirakçıları arasında tətbiq edilən interçeyncin (xidmət haqqı tariflərinin) yuxarı həddi”ni təsdiqləyib.

Bununla bağlı AMB-nin sədri Taleh Kazımov yeni qərar imzalayıb.

Qərara əsasən, ölkə daxilində ödəniş kartları ilə aşağıdakı MCC kodlar (təsərrüfat subyektinin fəaliyyət sahəsinin təsnifləşdirilməsi üçün ekvayer tərəfindən təsərrüfat subyektinə təyin edilən kod) üzrə aparılan ödənişlərdə ödəniş sistemlərinin iştirakçıları arasında tətbiq edilən interçeyncin yuxarı həddi aşağıdakı kimidir:

• “Drug Stores and Pharmacies” və “Grocery Stores and Supermarket” kateqoriyalarına aid MCC kodlar üzrə aparılan ödənişlərdə ödəniş məbləğinin 1,25 %-i;
• “Petrol” kateqoriyasına aid MCC kodlar üzrə aparılan ödənişlərdə ödəniş məbləğinin 0,75 %-i;
• “General” kateqoriyasına aid MCC kodlar üzrə aparılan ödənişlərdə ödəniş məbləğinin 1,5 %-i.
• digər MCC kodlar üzrə ölkə daxilində ödəniş kartları ilə aparılan ödənişlərdə ödəniş sistemlərinin iştirakçıları arasında tətbiq edilən interçeyncin yuxarı həddi müəyyən edilmir.

Qərar bu il iyunun 1-dən qüvvəyə minir.

Mənbə: report.az

Bəzi hallarda ikiqat vergitutmanın qarşısını almaq məqsədilə qeyri-rezident vergi ödəyicilərindən təsdiqedici sənədlər tələb olunur. Bu məsələlər beynəlxalq sazişlərin tələbləri ilə tənzimlənir. Bəs DTA-05 təqdim edən qeyri-rezidentdən qeydiyyatda olduğu ölkədə ödədiyi vergilər barədə sənədin tələb edilməsi nə ilə bağlıdır? Suala vergi mütəxəssisi Xəyal Feyzullayev aydınlıq gətirib.

X.Feyzullayevin sözlərinə görə, ikiqat vergitutmanın qarşısının alınmasında məqsəd vergidən yayınma hallarının aradan qaldırılması, vergi yükünün azaldılması və vergi öhdəliklərinin müəyyənləşdirilməsidir: “İkiqat vergitutmaların aradan qaldırılması haqqında beynəlxalq sazişlərin inzibatçılıq qaydaları mövcuddur. Həmin məsələlər bu qaydalarla tənzimlənir. Qaydalarda qeyd olunur ki, əgər qeyri-rezident vergi ödəyicisi əvvəllər DTA-04 forması ilə müraciət edib Azərbaycanda ödənilmiş vergilərin təsdiq edilməsi ilə əlaqədar arayış alıbsa və sonradan həmin vergilərin geri qaytarılması ilə əlaqədar DTA-05 forması ilə Azərbaycanda ödənilmiş vergilərin geri qaytarılmasını tələb edirsə, bu zaman bizim vergi orqanları haqlı olaraq həmin qeyri-rezidentdən əvvəl alınmış arayışla əlaqədar məlumatlar tələb edir”.

X.Feyzullayev bunun səbəbini də izah edib. Bildirib ki, ikiqat vergitutmaların məqsədi, əsasən, vergi öhdəliklərinin müəyyənləşdirilməsidir: “Əgər bir şəxs qeyri-rezident kimi Azərbaycanda ödədiyi vergiləri təsdiq etdirirsə, bu o deməkdir ki, potensial olaraq öz ölkəsində həmin vergiləri azaltdırmaq hüququ əldə edir. Ona görə də qeyri-rezident Azəbaycanda ödədiyi vergilərin geri qaytarılması üçün müraciət etdikdə artıq vergi orqanlarında həmin vergi ödəyicisinın vergidən yayınmaya yol verməsi ilə bağlı şübhələr yarana bilər. Həm təsdiq arayışı alıb öz ölkəsində vergiləri azaltdırır, eyni zamanda həmin vergiləri Azərbaycanda geri qaytarmaqla bağlı müraciət edir. Bu, potensial olaraq vergidən yayınmadır. Ona görə də vergi orqanları haqlı olaraq burada əlavə arayış tələb edə bilər ki, qeyri-rezident öz ölkəsindən belə bir sənəd gətirsin”.

Mənbə: vergiler.az

Bu il aprelin 1-nə Azərbaycanda 1 696 283 vergi ödəyicisi olub.

Bu barədə İqtisadiyyat Nazirliyi yanında Dövlət Vergi Xidmətinə istinadən xəbər verilir.

Məlumata görə, bu, ötən il aprelin 1-i ilə müqayisədə 5,1 % çoxdur.

Vergi ödəyicilərinin 86,8 %-i fiziki şəxslər, 13,2 %-i hüquqi şəxslər və digər təşkilatlardır. Son 1 ildə fərdi sahibkarların sayı 4,9 %, idarə, müəssisə və təşkilatların sayı isə 6,2 % artıb.

Bu il martın sonuna qeydiyyatda olan kommersiya qurumlarının sayı isə 1 il əvvələ nisbətən 6,8 % çox – 206 986 vahid təşkil edib.

Martda 750 vahid kommersiya qurumu dövlət qeydiyyatından keçib ki, onların 91,3 %-i yerli investisiyalı, 8,7 %-i xarici investisiyalıdır. Kommersiya qurumlarının 86,9 %-i elektron qaydada qeydiyyata alınıb. Yerli investisiyalı məhdud məsuliyyətli cəmiyyətlərin (MMC) elektron qeydiyyatının xüsusi çəkisi 97,2 % təşkil edib.

Dövlət qeydiyyatında olan kommersiya hüquqi şəxslərin 92,1 %-i MMC formasında yaradılıb.

Mənbə: report.az