Blog Full

Oxunma sayı: 138. 974

31 Okt 2023

Ölkədə ilk: Birbank Biznes-də sahibkarlar hesabı üz tanıma ilə açır

by | posted in: Xəbər | 0

Hüquqi şəxs və fərdi sahibkarların istifadəsində olan Birbank Biznes-də qeydiyyat prosesi asanlaşdırıldı. Belə ki, ölkədə ilk dəfə olaraq fərdi sahibkarlar biznes hesab açmaq üçün yeni “Üz identifikasiyası vasitəsilə qeydiyyat” funksiyasından yararlana bilərlər.

Bu yenilik sayəsində Birbank Biznes-də hesab açmaq üçün şəxsiyyət vəsiqəsinə ehtiyac olmadan şəxsi və şirkət haqqında ilkin məlumatları doldurmaq, “Asan İmza” ilə müqavilə və özünü qiymətləndirmə anketini təsdiqləyərək qeydiyyatı video üz tanıma ilə tamamlamaq kifayətdir. Bütün proses ortalama 3 dəqiqə vaxt aparır və biznes sahiblərinə filiala yaxınlaşmadan daha sürətli şəkildə Birbank Biznes-də qeydiyyatdan keçməyə, vaxta qənaət etməyə imkan verir.

Qeyd edək ki, Birbank Biznes-də biznes sahiblərinin mütəmadi istifadə etdiyi bir sıra xidmətlər var:

Biznes bank hesablarının açılması;
Təcili köçürmələr, milli və xarici valyutada köçürmələr;
Nağdsız ödənişlər;
Əməkhaqqı və biznes kartların sifarişi, çatdırılması və onlara mədaxil;
POS-terminal sifarişi, POS əməliyyatlarının onlayn izlənilməsi və çıxarışların əldə olunması;
Cari və kart hesabından QR-nağdlaşdırma;
Sənəd dövriyyəsi və sənədlərin kütləvi imzalanması;
Biznes krediti və bank qarantiyaları;
Mobil POS, e-ticarət və “Kliklə ödə” xidmətləri;
Özəl tarif paketləri və s.

Birbank Biznes müştərilərində suallar yaranarsa, onlara istənilən vaxt canlı çat vasitəsilə dəstək göstərilir.

Sahibkarlara vaxta qənaət etmək imkanı verən Birbank Biznes sistemi haqqında ətraflı məlumat üçün https://bir.bank/bbfipr saytına keçid edin və ya 896 məlumat mərkəzinə zəng edin.

30 Okt 2023

Dünyanın ən varlı ölkələri

by | posted in: Məqalə, Xəbər | 0

Varlı ölkələr təkcə öz iqtisadiyyatlarının tam inkişafını təmin etmirlər, onlar inkişaf etməkdə olan ölkələrin və öz qonşularının iqtisadiyyatını da stimullaşdırırlar. Ölkə nə qədər varlıdırsa, öz təsir dairəsini də bir o qədər genişləndirməyə səy göstərir. Adambaşına düşən ÜDM-nin ölçüsünə görə dünyanın on beş ən varlı ölkəsini diqqətinizə çatdırırıq.

Beləliklə, 15 ən varlı ölkə:

15–ci yer İslandiya

Adambaşına ÜDM: 52 150 ABŞ dolları.

İslandiya Şimali Avropanın qərbində yerləşən ada dövlətdir. İslandiya hökuməti aliminium zavodları inşası ilə bağlı geniş miqyaslı proqram elan edib. Ölkədə biotexnologiya, turizm, bank biznesi, informasiya texnologiyası aktiv inkişaf etməkdədir.

İslandiya sənayecə inkişaf etmiş ölkədir: kənd təsərrüfatında 7,8%, sənayedə 22,6%, xidmət sahəsində isə 69,6% əmək qabiliyyətli əhali məşğuldur. Turizm ölkənin ÜDM-ni inkişafında başlıca rol oynayır.

14–cü yer. Niderland.

Adambaşına düşən ÜDM: 53 580 dollar

Niderland iqtisadi cəhətdən yüksək inkişaf etmiş bir ölkədir. ÜDM-nin 73% xidmət sahəsinə, 24,5% sənaye və tikinti, 2,5% isə kənd təsərrüfatı və balıqçılığın payına düşür.

13–cü yer. Səudiyyə Ərəbistanı

Adambaşına düşən ÜDM: 55 260 dollar

Səudiyyə Ərəbistanı nəhəng neft ehtiyatlarına malik başlıca OPEK ölkəsidir. Neft ixracı ölkə ixracının 95 faizini, gəlirlərinin isə 75 faizini təşkil edir.

12–ci yer. ABŞ

Adambaşına düşən ÜDM: 59 500 dollar

Amerika Birləşmiş Ştatları yüksək inkişaf etmiş ölkədir, dünyanın ən nəhəng iqtisadiyyatına malik bir dövlətdir.

Ölkə sakinləri dünya əhalisinin cəmi 4,3% təşkil etsə də, məcmu dünya sərvətinin 40 faizi amerikanlara məxsusdur.

ABŞ bir sıra sosial-iqtisadi göstəricilərə görə, o cümlədən orta aylıq əməkhaqqı və əmək məhsuldarlığına görə dünyada qabaqcıl yerlərdən birini tutur.

11–ci yer. San–Marino

Adambaşına düşən ÜDM: 60 360 dollar

San-Marino dünyanın ən kiçik ölkələrindən biridir. Cənubi Avropada yerləşir və hər tərəfdən İtaliya ilə əhatə olunub.

Turizm bu ölkənin iqtisadiyyatında əhəmiyyətli rol oynayır, hər il bu cırtdan ölkəyə 3 milyondan çox turist gəlir.

10–cu yer. Honkonq

Adambaşına düşən ÜDM: 61 020 dollar

1999-cu ildən yenidən ÇXR ərazisi hesab olunsa da, öz iqtisadi müstəqilliyini daha 50 il ərzində qorunub saxlanılması ilə bağlı Çinlə müqaviləsi var. Honkonq ofşor zona olmasa da, azad liman hesab olunur və burada idxala görə gömrük rüsumları tutulmur və eləcə də ƏDV də yoxdur.

Honkonq – mühüm beynəlxalq maliyyə və ticarət mərkəzidir. O, ÇXR-in ən varlı şəhəri hesab olunur.

9–cu yer. İsveçrə

Adambaşına düşən ÜDM: 61 360 dollar

İsveçrə iqtisadiyyatı dünyanın ən stabil iqtisadiyyatlarından biridir. Aparılan uzunmüddətli monetar təminat və bank sirlərinin qorunması siyasəti İsveçrəni investorlar üçün təhlükəsiz bir məkana çevirib. Amma, bu siyasət həm də ölkəni xarici sərmayə axınından bir növ asılı vəziyyətə salıb.

Kiçik ərazi və əməyin yüksək ixtisaslaşması İsveçrənin iqtisadi resurslarından ötrü açar vasitələrə çevrilib. İsveçrə dünyada çıxarılan qızıl hasilatının üçdə ikisinin emal olunduğu bir ölkədir. Bu ölkədə ticarət və sənaye yüksək inkişaf edib.

8–ci yer. BƏƏ

Adambaşına düşən ÜDM: 68 250 dollar

Birləşmiş Ərəb əmirliklərinin iqtisadiyyatını ticarət, xam neft və qaz hasilatı və ixracı təşkil edir. Neft hasilatı gün ərzində təxminən 2,2 milyon barrelə yaxındır.

Neft bir neçə onillik ərzində BƏƏ iqtisadiyyatının yüksək templə inkişafını təmin edə bilib, bununla yanaşı ölkə iqtisadiyyatın digər sahələri də yüksək sürətlə inkişaf edib, xüsusilə də ticarət sahəsi. Hazırda Dubay dünyanın ən nəhəng ticarət xablarından biri hesab olunur.

7–ci yer. Küveyt

Adambaşına düşən ÜDM: 69 670 dollar

Küveyt Cənubi-qərbi Asiyada yerləşir. Əhəmiyyətli neft ixracatçısıdır, OPEK üzvüdür.

Yerli mütəxəssislərin araşdırmalarına görə Küveyt ən nəhəng neft yataqlarına – 102 milyard barrelə yaxın, yəni, dünya neft ehtiyatlarının 9% malikdir.

Küveytin ÜDM-nin 50 faizini neft təmin edir.

6–cı yer. Norveç

Norveç – Şimali Avropada ən böyük neft və qaz istehsalçısıdır. Su elektrik stansiyaları ölkənin enerjiyə tələbatının əhəmiyyətli hissəsini təmin etdiyindən, Norveçə çıxarılan neft və qazın böyük hissəsini ixrac etməyə imkan verir.

Neft fondları gələcək nəsillərin inkişafına xidmət edir. Ölkə ərazisində əhəmiyyətli minerallar ehtiyatları, böyük ticarət donanması var.

5–ci yer. İrlandiya

Adambaşına düşən ÜDM: 72 630 dollar

İrlandiya iqtisadiyyatı müasir, lakin elə də böyük olmayan, ticarətdən asılı olan iqtisadiyyatdır.

Baxmayaraq ki, İrlandiyanın iqtisadi yüksəlişinin başlıca mühərriki ixracdır, istehlak xərcləri və inşaatın bərpası, eləcə də işgüzar sərmayələr də iqtisadi yüksəlişə təkan verir.

4–cü yer. Bruney

Adambaşına düşən ÜDM: 76 740 dollar

Bruney – dünyanın ən varlı və təmin olunmuş dövlətlərindən biridir. Əhalisinin və sultanın sərvətinin həcminə görə bu ölkəni “islam Disneylendi” də adlandırırlar.

Ölkə iqtisadiyyatının əsasını neft hasilatı və emalı (il ərzində 10 milyon tondan çox) və təbii qaz (12 milyard kub metrdən çox) təşkil edir, həmin sərvətlərin ixracı valyuta daxilolmalarının 90 faizini təşkil edir.

3–cü yer. Sinqapur

Adambaşına düşən ÜDM: 90 530 dollar

Sinqapur – bazar iqtisadiyyatına və aşağı tarifli vergilərə əsaslanan yüksək inkişaf etmiş ölkədir, hansı ki, burada transmilli şirkətlər əhəmiyyətli rol oynayır.

Sinqapur aşağı vergi tarifləri investorlar üçün çox cəlbedici ölkədir. Ölkədə elektronika, gəmiqayırma sənayesi, maliyyə xidmətləri sektoru çox inkişaf edib. Biotexnologiya sahəsində geniş miqyaslı tədqiqatlar aparılır.

2–ci yer. Lüksemburq

Adambaşına düşən ÜDM: 109 190 dollar ab olunur.

Avropa Birliyinin bir çox təşkilatları Lüksemburq şəhərində yerləşir.

Əlverişli şərait və ofşor zona sayəsində Lüksemburq şəhərində minə yaxın investisiya fondları və 200-dən çox banklar yerləşir ki, bu, dünyanın istənilən yerindəkindən çoxdur.

1–ci yer. Qətər

Adambaşına düşən ÜDM: 124 930 dollar

Qətər – BVF-nin məlumatına görə dünyanın ən varlı ölkələrindən biridir. Bu ölkə artıq bir neçə ildir ki, adambaşına düşən ÜDM göstəricisinə görə dünyada liderlik edir.

Təbii qaz ehtiyatlarına görə Qətər dünyada üçüncü, təbii qaz ixracına görə 6-cı və neft və neft məhsulları ixracına görə 21-ci yeri tutur.

30 Okt 2023

Əlilliyi olan şəxsə baxan valideynə hansı vergi güzəşti tətbiq olunur?

by | posted in: Xəbər | 0

Vergi Məcəlləsinin 102.3 maddəsinə əsasən, əlilliyi olan şəxsə baxan valideynin aylıq gəliri 200 manat azaldılır. Bilmək istərdim, əlilliyi olan şəxsin əlilliyi müharibə ilə əlaqədardırsa, bu halda valideynin gəlirlərinə əlavə güzəşt tətbiq olunurmu?

İqtisadiyyat Nazirliyi yanında Dövlət Vergi Xidmətindən bildirilib ki, daimi qulluq tələb edən 18 yaşınadək əlilliyi müəyyən edilmiş və ya orqanizmin funksiyalarının 81-100 faiz pozulmasına görə əlilliyi müəyyən edilmiş şəxsə baxan və onunla birlikdə yaşayan valideynlərdən (o cümlədən övladlığa götürən şəxslərdən) birinin (özlərinin istəyi ilə), arvadın (ərin), himayəçinin və ya qəyyumun hər hansı muzdlu işdən vergi tutulmalı olan aylıq gəliri 200 manat məbləğində azaldılır.

Bu güzəşt hüququ aşağıda qeyd olunan sənədlərin birinin təqdim edildiyi andan tətbiq edilir və yalnız əsas iş yerində (əmək kitabçası olduğu yerdə) həyata keçirilir:

himayədə olma faktı barədə məhkəmə orqanlarının qərarı;
ər və arvaddan birinin güzəştdən istifadə edib-etməməsi barədə onların əmək kitabçasının olduğu işəgötürənin arayışı;
uşağın doğum haqqında şəhadətnaməsinin surəti:
birgə yaşamaq haqqında mənzil-kommunal istismar sahəsinin, yaxud icra hakimiyyəti nümayəndəliyinin arayışları;
Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondunun yerli qurumunun arayışı
övladlığa götürmə barədə məhkəmə qərarının surəti.

Əsas: Vergi Məcəlləsinin 102.3-cü maddəsi, Nazirlər Kabinetinin 2001-ci il 4 yanvar tarixli 4 nömrəli Qərarı ilə təsdiq edilmiş “Əmək haqqından tutulan vergi hesablanarkən fiziki şəxslərin vergi güzəştləri hüququnun müəyyənləşdirilməsi üçün sənədlərin Siyahısı”

Mənbə: vergiler.az

30 Okt 2023

Mənfəət vergisi üzrə kameral vergi məktubları barədə tövsiyələr

by | posted in: Xəbər | 0

Mənfəət vergisi üzrə kameral yoxlama nədir?

Kameral vergi yoxlaması səyyar vergi yoxlamasından fərqli olaraq yerlərə getmədən aparılır. Bu zaman məlumatlar vergi ödəyicisinin təqdim etdiyi bəyannamələr, arayışlar və digər hesabatlardan götürülür. Yoxlamanı aparan vergi orqanı özündə olan əlaqədar sənədlərdən də istifadə edir. Mənfəət vergisi üzrə kameral yoxlama zamanı təqdim edilmiş məlumatlarda uyğunsuzluq aşkar edilərsə vergi ödəyicisinə kameral vergi məktubu yazılır və dəqiqləşdirilmiş məlumatlar tələb edilir. Tam formada “Kameral vergi yoxlaması üçün zəruri olan sənədlərin (məlumatların) tələb edilməsi haqqında məktub” adlanan bu sənəd çatışmamazlıqların aşkar edildiyi gündən sonrakı iş günündə yazılır və İnternet Vergi İdarəsindəki elektron qutusuna göndərilir. Bəzən bu məktubu sadəcə “kameral” yaxud uyğunsuzluq məktubu da adlandırılar.

Yuxarıda qeyd edilənlər digər vergi növləri üzrə kameral yoxlamalara da aiddir və Azərbaycan Respublikası Vergi Məcəlləsinin 37-ci maddəsi əsasında tətbiq edilir.

Kameral yoxlama məktubuna cavab verilməsi

Mənfəət (gəlir) vergisi üzrə kameral vergi yoxlaması uyğun bəyannamənin təqdim edildiyi vaxtdan 90 iş günü ərzində aparılır (digər vergilər üçün 30 iş günüdür). Vergi ödəyicisi uyğunsuzluq məktubunda qeyd edilən müddət ərzində onu cavablandırmalı, lazımı sənədləri təqdim etməlidir. Əks təqdirdə vergi orqanının onun öhdəliklərini yenidən hesablamaq hüququ var.

Bütün vergi növləri üçün kameral yoxlama məktubunun strukturu eynidir. Təbi ki, hər bir hal üçün uyğunsuzluqların məzmunu fərqli olacaq. Odur ki, aşağıdakı nümunələrdə məktubun yalnız uyğunsuzluq hissəsi əks etdirilib.

Vergi ödəyicisi tələb olunan hesabatları, məlumatları, habelə dəqiqləşdirilmiş vergi bəyannaməsini qanunvericiliyə uyğun formada təqdim etməlidir. Kameral vergi yoxlamasına cavab məktubunun standart forması yoxdur, amma bu zaman Vergi Məcəlləsinin müvafiq maddələrinə istinad edilməli, cavablar aydın və əsaslandırılmış olmalıdır.

Xərclərin tərkibi haqqında kameral yoxlama nümunəsi

“ABC” MMC-yə daxil olan mənfəət vergisi üzrə kameral vergi məktubunda qeyd olunan uyğunsuzluq aşağıda verilib.

Məktub mənfəət vergisi bəyannaməsi ilə pul vəsaitlərinin çıxarılmasına görə sadələşdirilmiş vergi bəyannaməsinin məlumatları arasında yaranmış fərqlə bağlıdır. Kameral yoxlamanın başa çatdırılması üçün gəlirlərin əldə edilməsi ilə bağlı xərclərin dəqiqləşdirilməsi tələb olunur.

Uyğunsuzluq məktubunu alan vergi ödəyicisi hər iki bəyannamədə göstərilmiş məlumatları bir daha yoxlamalıdr. Fərq müxtəlif səbələrdən ola bilər, məsələn:

gəlirlərin əldə edilməsi ilə bağlı xərclərin düzgün təsnif edilməməsi;
hesablamalar zamanı buraxılmış texniki səhv;
qeyd edilən məbləğlərin düzgün müəyyən edilməməsi və sair.

“ABC” MMC-nin araşdırmadan sonra hazırlayacağı kameral vergi yoxlamasına cavab məktubunun mümkün variantı aşağıda verilib.

Cavab nümunəsi:

xx/xx/xxxx tarixli xxxxxxxx saylı kameral uyğunsuzluq məktubuna cavab olaraq qeyd etmək istərdik ki, mənfəət vergisi bəyannaməsinin 233.5-ci sətrində əks etdirilən 58.65 manat ilə sadələşdirilmiş vergi bəyannamələrinin bank hesabından nağd çıxarılmış pul vəsaitinin məbləğlərinin cəmi üzrə hesablanmış 0 manat məbləğ arasındakı 58.65 manat fərq müəssisənin USD hesabından nağd çıxarılan vəsaitlərə görə vergi komissiyası xərcidir. Təsdiqedici sənəd olaraq USD bank hesabından çıxarış qoşma fayl şəklində əlavə edilir. Xahiş edirik ki, nəzərə alasınız.

Bəyannamələrin məlumatları arasındakı fərqlə bağlı məktub nümunəsi

Mənfəət vergisi ödəyicisi kameral yoxlama məktubu alıb. Aşağıda məktubdan uyğunsuzluq olan hissə verilib.

Yuxarıdakı uyğunsuzluq məktubu AVİS sistemində bəyannamələrin yoxlanması prinsipinin mahiyyətindən yaranıb. Kameral yoxlama zamanı sistem mənfəət vergisi bəyannaməsi və ödəmə mənbəyində tutulan vergi bəyannaməsinin müvafiq sərtlərini sadəcə müqayisə etmiş, hesablama və kassa metodunun tətbiqinin mahiyyətinə varmamışdı. Aşağıda kameral vergi məktubuna cavabın mümkün variantı verilib.

Cavab nümunəsi:

Sizin xx/xx/xxxx tarixli xxxxxxxxxxxxx saylı kameral vergi yoxlaması üçün zəruri olan sənədlərin tələb edilməsi barədə məktuba cavab olaraq aşağıdakıları bildiririk.

Vergi Məcəlləsinin 136-cı maddəsinə görə vergi ödəyicisi vergi uçotunun aparılması üçün hesablama metodundan istifadə etdikdə, əqdlə bağlı olan xərcin çəkilməsi vaxtını birmənalı olaraq maliyyə öhdəliklərini qəbul etdiyi vaxt hesab edir. “XYZ” MMC 2022-ci il üzrə mənfəət vergisi bəyannaməsi hesablama metodu ilə təqdim etmişdir, müvafiq olaraq hesablanılan 27934.88 manat məbləği fiziki şəxslər üzrə icarə üzrə kimi bəyannamədə nəzərə almışdır.

Həmçinin, Vergi Məcəlləsinin 124.1-ci maddəsinə əsasən daşınan və daşınmaz əmlak üçün icarə haqqından, həmçinin rezidentin və ya qeyri-rezidentin Azərbaycan Respublikasındakı daimi nümayəndəliyinin ödədiyi və ya onun adından ödənilən royaltidə gəlir bu Məcəllənin 13.2.16-cı maddəsinə uyğun Azərbaycan mənbəyindən əldə edilmişdirsə, ödəmə mənbəyində 14 faiz dərəcə ilə vergi tutulur. Müvafiq maddəni nəzərə alaraq bildirmək istərdik ki, 2022-ci il üzrə 23639.53 manat fiziki şəxslər üzrə icarə haqqı ödənildiyindən ödəmə mənbəyindən vergi ödənilmiş icarə haqqına müvafiq hesablanmış və büdcəyə ödənilmişdir. Xahiş edirik ki, nəzərə alasınız.

Kameral vergi yoxlaması, mənfəət vergisi üzrə kameral vergi məktubuna cavablara nümunələrin sayını artırmaq olar. Təəssüf ki, məqalənin həcmi buna imkan vermir. Amma saytımızın “Vergi” bölməsində uyğun vergi növlərini seçməklə müxtəlif uyğunsuzluqlara cavab nümunələri tapmaq olar.