Mikrobizneslə bağlı qanun layihəsi müzakirə ediləcək

Milli Məclisin qarşıdan gələn növbəti – 2018-ci il payız sessiyasında iqtisadi sektor, sahibkarlıq fəaliyyəti ilə bağlı mühüm qanunların qəbulu və ya mövcud qanunlara ciddi dəyişikliklərin edilməsi nəzərdə tutulur. Parlamentin İqtisadi siyasət, sənaye və sahibkarlıq komitəsinin üzvü Rüfət Quliyevin bildirdiyinə görə, sessiyada xüsusilə ölkədə prioritet sahələrdən sayılan sahibkarlıq fəaliyyətinin inkişafı ilə bağlı mühüm sənədlərin qəbulu gözlənilir. Bunlardan biri də «Mikrobiznes haqqında» qanun layihəsidir.

Mühasibat sahəsində ən son iş elanları və xəbərlərini izləmək üçün linkə daxil olaraq qrupumuza üzv olun.

İqtisadçı ekspert Samir Əliyevin fikrincə, mikromüəssisələrin bir subyekt olaraq müəyyənləşdirilməsi çox vacibdir. Bu, onların fəaliyyətinə münasibətdə fərqli vergi rejimi, fərqli hesabatlılıq sistemi, fərqli yoxlama prosedurlarını tətbiq etməyə imkan verər: «Bir qayda olaraq, bu rejimlər, hesabatlılıq və prosedurlar sadələşdirilmiş xarakter daşıyır. Mikromüəssisələrin inkişafı iş yerlərinin açılması, azad rəqabət mühitinin təmin edilməsi baxımından faydalıdır. Azərbaycanda uzun müddət sahibkarlıq subyektləri ölçüsünə görə təsnifləşdirilərkən kiçik, orta və iri  olmaqla, 3 yerə bölünüb. 2017-ci ilin sonundan isə qanunvericiliyə edilmiş dəyişiklik nəticəsində mikrosahibkarlıq kateqoriyası rəsmi təsdiqini tapıb. Xarici ölkələrdə fəaliyyət göstərən müəssisələrin 99-95%-i kiçik və orta müəssisələrin payına düşür ki, onların da 85-95%-ni mikromüəssisələr təşkil edir. Ümumi məşğulluqda mikromüəssisələrin payı isə, müxtəlif ölkələr üzrə 20-35% arasında dəyişir. İl ərzində ümumi iqtisadiyyatın 20-30%-i mikromüəssisələr vasitəsilə yaranır. Bu baxımdan, dünyada mikrobiznes hökumətlərin diqqət mərkəzində olur və bu sahəyə xüsusi yanaşma tətbiq edilir».