Blog Full

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinə daxil olan vətəndaş müraciətlərinin bir qismində ayrı-ayrı işəgötürənlər tərəfindən əmək haqlarından, zərərə görə ödənclərdən və s. ibarət sosial xarakterli ödənişlərin işçilərə ödənilməsinin gecikdirildiyi ifadə olunub.

Nazirliyin İctimaiyyətlə əlaqələr şöbəsindən verilən məlumata görə, xidmət belə müraciətlərin hər biri ilə əlaqədar qanunvericiliyin tələblərinə uyğun şəkildə tədbirlərin görülməsini və cari ilin birinci rübündə 20 min manatdan artıq gecikdirilmiş sosial xarakterli ödənişlərin işəgötürənlər tərəfindən işçilərə ödənilməsini təmin edib. Həmin vəsaitin 51,1%-i əmək haqlarından, 43,9%-i zərərə görə ödənclərdən, qalan hissəsi işəgötürənlər tərəfindən ödənilməli olan sosial müavinət və kompensasiyalardan ibarət olub. Bu istiqamətdə tədbirlər görülərkən aidiyyəti işəgötürənlərə əməyin ödənilməsinin təminatları, əmək haqqının ödənilməsinin formaları, qaydaları, müddətləri, əvəzçilik üzrə əmək haqqının ödənilməsi və s. barədə qanunvericilik ətraflı izah olunub.

Dövlət Əmək Müfəttişliyi Xidmətinin 2018-ci il üzrə Tədbirlər Planına uyğun olaraq, Bakının rayonlarında, habelə Sumqayıt şəhərində, Şəmkir, Tovuz, Lənkəran, Masallı və digər rayonlarda  təbliğat-marifləndirmə məqsədilə regional seminar-müşavirələr də keçirilib. Bu tədbirlər çərçivəsində işəgötürənlər və işçilər arasında əmək qanunvericiliyi və onun tətbiqinə dair konkret mövzularda, habelə qadınların və uşaqların əmək hüquqları ilə bağlı geniş məlumatlandırma işləri aparılıb və ilin sonunadək bu tədbirlər davam etdiriləcək.

Mənbə: apa.az

Ən son mühasibat xəbərlərini qaçırmaq istəmirsinizsə, bu linkə daxil olaraq XƏBƏRLƏRƏ ABUNƏ OLUN.

Aprelin 10-13-də Bakıda Dünya Bankının “Dünya maliyyəsinin idarəedilməsi üzrə təcrübə mübadiləsi (PEMPAL) proqramı çərçivəsində Xəzinədarlıq orqanlarının növbəti seminar-konfransı keçirilib.

Tədbirdə 18 ölkənin 70-dən çox nümayəndəsi, o cümlədən Dünya Bankı və PEMPAL katibliyinin təmsilçiləri, xarici ekspertləri iştirak ediblər.

İnformasiya texnologiyaları, mühasibat uçotu və hesabatlıq sahəsində aparılan islahatlara həsr olunan seminar-konfrans çərçivəsində Azərbaycan Respublikası Maliyyə Nazirliyinin Dövlət Xəzinədarlığı Agentliyində tətbiq olunan, real vaxt rejimində bütün xəzinə və bank əməliyyatlarını həyata keçirən və faktiki xərclərə nəzarəti təmin edən Xəzinədarlığın İdarəedilməsinin İnformasiya Sistemi iştirakçılarda böyük maraq yaradıb.

Tədbirin rəsmi açılışında Milli Məclisin İqtisadi siyasət komitəsinin sədri Ziyad Səmədzadə və maliyyə nazirinin müavini Azər Bayramov çıxış edərək tədbirin əhəmiyyətindən və vacibliyindən, maliyyə sistemində uğurla həyata keçirilən islahatlardan, habelə qarşıda duran vəzifələrdən bəhs ediblər.

Z.Səmədzadə bildirib ki, Prezident İlham Əliyev tərəfindən uğurla aparılan müdrik dövlətçilik siyasəti nəticəsində Azərbaycan qısa dövr ərzində yeni inkişaf mərhələsinə qədəm qoyaraq bir çox zirvələri fəth etmiş, iqtisadi qüdrəti günü-gündən artan, etibarlı tərəfdaş kimi dünyada yüksək nüfuza malik ölkəyə çevrilib. O qeyd edib ki, Azərbaycanın maliyyə imkanlarının artması, ölkəmizin beynəlxalq layihələrin təşəbbüskarı və əsas iştirakçısı kimi çıxış etməsi, müasir tələblərə cavab verən infrastrukturun yaradılması Azərbaycanın dünyada nüfuzunun daha da artmasına, iqtisadiyyatın rəqabət qabiliyyətinin yüksəlməsinə səbəb olub.

A.Bayramov isə dövlət maliyyəsinin idarə olunması sahəsində aparılan islahatlar və bu sahədə şəffaflığın təmin olunması istiqamətində əldə olunan nailiyyətlərlə yaxından tanış olmaq, müasir informasiya texnologiyalarının tətbiqi ilə əlaqədar ən qabaqcıl təcrübələrin mübadiləsi, yeniliklərin tətbiqi, digər ölkələrdə mövcud olan analoji sistemlərin xüsusiyyətlərini və təcrübəsini öyrənmək məqsədilə belə tədbirlərin keçirilməsinin əhəmiyyətini qeyd edib.

Mənbə: report.az

Ən son mühasibat xəbərlərini qaçırmaq istəmirsinizsə, bu linkə daxil olaraq XƏBƏRLƏRƏ ABUNƏ OLUN.