Blog Full

Dəfn pulu üçün müraciət edilməsi

Ölüm hadisəsi sosial sığorta hadisəsi sayılır və mərhumun dəfn xərcini öz öhdəsinə götürmüş şəxslərə verilir. Bəzən dəfn pulu adlanan bu vəsait, dövlət sosial sığorta vəsaitləri hesabına birdəfəlik ödənilir. Dəfn üçün müavinətin verilməsi mərhumun dəfninə çəkilən xərcləri kompensasiya etmək üçündür.

Azərbaycan Respublikası vətəndaşları, respublika ərazisində daimi yaşayan vətəndaşlığı olmayan şəxslər və əcnəbilərdə sosial sığorta hadisəsi baş verdikdə müavinət almaq hüququ yaranır. Dəfn pulu verilən şəxslərin tərkibi haqqında buradan oxuya bilərsiniz.

Hüququn təmin edilməsi qanunvericiliyə uyğun sənədlərin araşdırılması əsasında aparılan təyinat və dövlət sosial sığorta fondunun vəsaiti hesabına təmin edilir.

Dəfn müavinətinin təyin edilməsi üçün aşağıdakı qaydada müraciət edilir:

• əmək müqaviləsinə ölüm hadisəsinə görə xitam verilən sığortaolunanlar üçün – işəgötürənə (sığortaedənə);
• müavinət almaq hüququ yarandığı digər hallarda isə yaşayış yeri üzrə Dövlət Sosial Müdafiə Fondunun struktur bölməsinə, “DOST” mərkəzinə və ya “Şəhid ailələri üzvlərinin, müharibə ilə əlaqədar xəsarət almış hərbi qulluqçuların və əlilliyi müəyyən edilmiş şəxslərin müraciətləri üzrə vahid əlaqələndirmə mərkəzləri”nə.

Qeyd edək ki, dəfn üçün müavinətin verilməsi məqsədi ilə müraciətin vaxtı məhdudlaşdırılmır.

Sığortaedəndə sənədlərin hazırlanması

Bizi daha çox sığortaolunanın ölümü səbəbindən əmək müqaviləsinə xitam verildikdə dəfn pulunun verilməsi halları maraqlandırır. Bu hal Əmək Məcəlləsinin 77.7-ci maddəsi ilə tənzimlənir. Müavinətin təyin edilməsi üçün sığortaedənə aşağıdakı sənədlər təqdim edilir:

• vətəndaşlıq vəziyyəti aktlarının dövlət qeydiyyatını aparan orqanın verdiyi ölüm haqqında arayış;
• mərhumun dəfnini öhdəsinə götürən şəxs haqqında bələdiyyənin arayışı.

Müdiriyyətin müavinət təyin edən komissiyası dəfn üçün müavinət almaq hüququnu, onun məbləğini müəyyən edir, müavinətin təyin edilməsi haqda komissiyası iclasının protokolunda bunları qeyd etməklə qərar qəbul edir. Həmin məlumatlar ölüm arayışının arxasında komissiyanın səlahiyyətli üzvünün imzası ilə qeyd edilir.

Müavinət təyini zamanı qanunvericiliyin tələbləri pozulduqda baş (böyük) mühasib yol verilmiş nöqsanları yazılı surətdə göstərilməklə sənədləri komissiyaya qaytarır.

Sənədlər sığorta edən tərəfindən müvafiq qaydada rəsmiləşdirildikdən sonra aşağıdakı sənədlər əlavə edilməklə DSMF-nin yerli qurumlarına yaxud “DOST” mərkəzlərinə məktubla dəfn müavinətinin verilməsi üçün müraciət edilir:

• komissiyanın protokolunun surəti;
• ölüm haqqında arayış;
• bələdiyyənin arayışı;
• müavinəti alacaq şəxsin bank rekvizitləri yaxud ünvanı;
• təsdiq olunmuş formada haqq-hesab cədvəli.

Müavinətin hesablanması 

Qeyd etdiyimiz kimi dəfn pulu almaq üçün haqq-hesab cədvəli təqdim edilir. Haqq-hesab cədvəli tərtib edilərkən təyin edilmiş müavinətin məbləği hesablanaraq uyğun xanaya daxil edilməlidir. Sığortaolunan üçün verilən dəfn üçün müavinətin miqdarı orta aylıq əməkhaqqının üç mislindən az olmamalıdır. Orta əməkhaqqının hesablanması Əmək Məcəlləsinə əsasən aparılır. Məcəllənin 177.2-ci maddəsi iki aydan çox işləyib vəfat etmiş şəxslərə münasibətdə tətbiq olunur. Nümunəyə baxaq.

Nümunə 1: Vəzifə maaşı 500 manat olan işçi oktyabr ayında vəfat edir. Müavinətin hesablanması üçün ödənişdən əvvəlki iki ayın gəliri həmin aylardakı iş günlərinə bölünür və tapılmış vəsait əməkhaqqı saxlanılan iş günlərinə vurulur. İş günləri avqust ayında 23, sentyabr ayı üçün isə 22 gündür.

1000/(23+22)=22,22 manat;

Şəxsin vəfat etdiyi ayda 21 iş günü var, orta aylıq əməkhaqqı – 22,22*21=466,62;

Ödəniləcək müavinətin məbləği 466,62*3= 1399,86 manat olacaq.

ƏM-nin  177.3 maddəsinə əsasən  işçi iki aydan az vaxtda işləmiş olduqda  orta  əməkhaqqının təyini zamanı  onun faktiki işlədiyi günlərin qazancı həmin günlərin sayına bölünür. Sonra isə alınmış məbləğ iş günlərinin sayına vurulur.

Nümunə 2: Merkur MMC-də işləyən işçibir aydansonra vəfat edir. Onun vəzifə maaşı 300 azn, iş günləri işlədiyi müddət ərzində 20, vəfat etdiyi ayda isə 22 gündən ibarətdir. Bu halda:

300 / 20 = 15;

22 * 15 = 330 manat.

Beləliklə, dəfn üçün müavinət 330* 3 = 990 manat olacaqdır.

Həmkarlar ittifaqları dəfn pulunun düzgün təyini və hesablanmasına nəzarət etməlidir.

Müavinətin ödənilməsi

Dəfn müavinətinin verilməsi üçün təqdim olunan sənədlər fond tərəfindən iki iş günü ərzində araşdırılır və ödənişi icra olunur. Araşdırma prosesində sığortaedəndən əlavə məlumatlar da tələb oluna bilər.

Əgər müavinət alanın bank rekvizitləri yaxud faktiki yaşayış ünvanı müəssisə tərəfindən düzgün göstərilməzsə və bu səbəbdən alınmayan müavinətin səhv ünvandan geri qaytarılması mümkün deyilsə, müavinət müəssisənin vəsaiti hesabına bərpa olunur.

Dəfn üçün müavinətin verilməsi xərcləri dövlət sosial müdafiə fondunun vəsaiti hesabına həyata keçirilir.

Dəfn üçün müavinətin təyin edilməsinə və hesablanmasına müəssisənin rəhbərliyi və baş (böyük) mühasib məsuliyyət daşıyırlar.

Səhv təyinat yaxud təyinatın ləngidilməsinə görə DSMF-nın yerli struktur vahidinə, habelə müvafiq həmkarlar ittifaqına şikayət edilə bilər.

Vergi Məcəlləsinə əsasən, malların idxalı dedikdə, idxal malları hesab olunan məhsulların ölkə ərazisinə gətirilməsi başa düşülür. Qanunvericiliyə uyğun olaraq, mallarla yanaşı, xidmət və işlərin idxalı üzrə əməliyyatlar da həyata keçirilir. Bəs bu zaman xarici ölkələrdəki şirkətlərə edilən ödənişlər necə reallaşdırılır? Gecikmə hallarında hansı tədbirlər görülür? Mövzu ilə bağlı iqtisadçı ekspert Anar Bayramov aydınlıq gətirir:

Təcrübədə ən çox istifadə olunan ödəniş – avans ödənişidir. Həm alqı-satqı müqaviləsində, həm də gömrük bəyannamələrində avans ödənişlər barədə mütləq qeydlər aparılmalıdır.

Mərkəzi Bankın 45/1 saylı 28 noyabr 2016-cı il tarixli qərarı ilə təsdiq olunmuş “Azərbaycan Respublikasının rezidentlərinin xarici valyutada, habelə qeyri-rezidentlərin milli və xarici valyutada əməliyyatlarının aparılması Qaydaları”na əsasən, qabaqcadan ödəniş aparıldıqda banka ödənişin təyinatını, şərtlərini və məbləğini əks etdirən sənəd təqdim edilir. Qaydaların 4.3.1.3-cü maddəsinə əsasən, qabaqcadan ödəniş müqabilində malların ölkəyə idxalını (xidmətlərin göstərilməsini) təsdiq edən gömrük bəyannaməsi (xidmətlərin göstərilməsini təsdiq edən sənəd) banka təqdim olunmalıdır və ya xeyrinə qabaqcadan ödənişin edildiyi şəxs və ya üçüncü şəxs tərəfindən qabaqcadan ödənilmiş məbləğ geri qaytarılmalıdır.

Qaydalarda həmçinin qeyd edilir ki, müvafiq sənədlər ödənişin aparıldığı gündən ən geci 2 (iki) il müddətində (idxal hava, dəmir yolu və dəniz nəqliyyatı vasitələri, habelə kosmik obyektlərlə əlaqədar olduqda və onların təchizat müddəti 2 (iki) ildən çox təşkil etdikdə müqavilədə nəzərdə tutulan təchizat müddəti bitdikdən sonra ən geci 3 (üç) ay müddətində) banka təqdim edilmədikdə və ya qabaqcadan ödənilmiş məbləğ geri qaytarılmadıqda və bu zaman idxal edilməyən malların (göstərilməyən xidmətlərin) və ya geri qaytarılmayan məbləğin qalıq dəyəri 10.000 ABŞ dolları ekvivalenti məbləğindən çox olduqda, bank tərəfindən qabaqcadan ödəniş əməliyyatına dair bütün sənədlər 5 (beş) iş günü ərzində Azərbaycan Respublikasının Mərkəzi Bankına təqdim edilir.

Misal

“AA” MMC 5 iyun 2021-ci ildə malların ölkəyə idxalı ilə bağlı xarici kontragentə 20.000 dollar məbləğində avans ödənişi edib. Amma 2 il müddət keçməsinə baxmayaraq, malların ölkəyə idxalını təsdiq edən gömrük bəyannaməsi və ya idxal olunan xidmətlərin göstərilməsini təsdiq edən sənədi təqdim etməyib. Həmin müddət ərzində mallar və ya xidmətlər idxal olunmur. Bu zaman “AA” MMC avans məbləği geri qaytarmazsa, ona Mərkəzi Bank tərəfindən inzibati cərimə tətbiq oluna bilər. Çünki İnzibati Xətalar Məcəlləsinin 430.4-cü maddəsinə əsasən, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin 10 faizindən 20 faizinədək məbləğdə, hüquqi şəxslər isə inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.

Ödənişin digər forması akkreditiv formasında rəsmiləşdirməklə həyata keçirilən ödənişlərdir. Bu zaman proses aşağıdakı ardıcıllıqla həyata keçirilməlidir:

• idxal edən sahibkar qarşı tərəflə bağladığı müqavilədə akkreditiv formada ödəniş üsulunu nəzərdə tutan müqavilə imzalayır;
• idxalçı sahibkar bankda geri çağırıla bilməyən akkreditiv hesab açır və bank da həmin məlumatı ixrac edən sahibkarın bankına (avizo edən) göndərir;
• avizo edən bank akkreditivi aldıqdan sonra onun etibarlılığını yoxlayır və təsdiq edərək ixracatçıya məlumat verir;
• şirkət ixrac əməliyyatlarını həyata keçirdikdən sonra avizo edən bankı məlumatlandırır. Bank da öz növbəsində akkreditivlə bağlı sənədləri idxalçı sahibkarın bankına yönləndirir;
• idxalçı sahibkar aldığı sənədlərin akkreditivin şərtlərinə uyğunluğunu təsdiqlədikdən sonra vəsaitin ödənişini avizo edən bank vasitəsilə həyata keçirir;
• avizo edən bank vəsaitləri qəbul etdikdən sonra onu satıcının hesabına köçürür.

Qeyd edək ki, geri çağırıla bilməyən akkreditiv dedikdə, vəsait alanın razılığı olmadan ləğv edilə və ya dəyişdirilə bilməyən akkreditiv nəzərdə tutulur. Geri çağırıla bilməyən akkreditiv emitent bankın qəti öhdəliyidir, bankın razılığı olmadan dəyişdirilə və ya ləğv edilə bilməz.

Digər bir ödəniş növü isə konsiqnasiya formasında həyata keçirilən ödənişlərdir. Əgər ödənişlər konsiqnasiya formasında aparılacaqsa, mütləq müvafiq şərtlər müqavilədə öz əksini tapmalıdır. Şərtlərə görə, konsiqnasiya sahibkara (tapşırana) malları (konsiqnasiya mallarını) çatdırmaq məqsədilə başqa şəxsin anbarında saxlamaq hüququ verir. İkinci tərəf konsiqnasiya mallarını saxlamağı öhdəsinə götürür və konsiqnasiya müqaviləsinin şərtlərinə əsasən bu mallara dair sərəncam vermək hüququna malikdir. Mallar idxal olunandan sonra ödənişin aparılması kimi hesablaşmalar da müqavilədə öz əksini tapmalıdır. Adətən, bu tip ödənişlər uzun müddət əməkdaşlıq edən tərəflər arasında aparılır. Təbii ki, bu zaman iddia müddəti real olmalıdır. Çünki Mülki Məcəlləyə əsasən, müqavilə tələbləri üzrə iddia müddəti üç il, daşınmaz əşyalarla bağlı müqavilə tələbləri üzrə iddia müddəti isə altı ildir.

Mənbə: vergiler.az

Kimə təhtəlhesab şəxs kimi pul avansı verilə bilər? Ezamiyyə zamanı işçinin xərcləri üçün vəsait necə verilir? Avans hesabatı təhtəlhesab şəxs tərəfindən necə təqdim olunur? Bu və digər sualların cavabını təqdim edilən məqalədən tapa bilərsiniz.

İşçiyə pul avansı nə vaxt verilir?

Müəssisə və təşkilatlar uyğun sərəncamla (ezamiyyə əmri) öz işçilərini daimi iş yerindən başqa yerə müəyyən müddətə ezamiyyətə göndərə bilər. İşçilərin başqa yerə xidməti tapşırığı yerinə yetirmək üçün ezam olunması Azərbaycan Respublikası Maliyyə Nazirliyinin təsdiq etdiyi “İşçilərin ezamiyyə qaydaları” ilə tənzimlənir.

Qeyd edilən qaydaların birinci, “Ümumi müddəalar” bölməsinin 5-ci maddəsinə görə “Ezam olunan işçiyə ezamiyyətə getməzdən əvvəl ezamiyyətin müddətinə uyğun olaraq pul avansı verilir”. Belə işçilər təhtəlhesab şəxslər hesab olunur.

Pul avansı həm kassadan nağd şəkildə, həm də işçinin kart hesabına köçürülməklə ödənilə bilər.

Pul avansı ezamiyyə xərclərindən başqa həm də:

• təsərrüfat xərcləri;
• nümayəndəlik xərcləri üçün verilə bilər.

Verilmiş vəsait təyinatı üzrə xərclənir, sonra isə mühasibatlığa avans hesabat təqdim olunur. Avans məbləğ üzrə əməliyyatlar kassa əməliyyatlarının aparılması qaydaları ilə tənzimlənir.

Kimlər təhtəlhesab şəxs ola bilər?

Müəssisənin maraqları naminə malların, iş və xidmətlərin (məsələn, ezamiyyə zamanı mehmanxana xidmətləri) ödənilməsi üçün vəsait verilmiş şəxslər təhtəlhesab şəxslər hesab edilir. Hüquqi şəxsin yaxud fərdi sahibkarın istənilən işçisi təhtəlhesab şəxs ola bilər. Bunun üçün menecer ona əmrlə müvafiq səlahiyyətlər verir və gələcək xərcləri təsdiq edir.

Rəsmi olaraq müəssisədə işləməyən şəxs yaxud təsisçi təhtəlhesab şəxs kimi pul götürə bilməz. Bu fərdi sahibkara da aiddir, çünki o, öz sahibkarlıq subyektinin işçisi deyil. Amma bu, sahibkara problem yaratmır, çünki xərc istiqamətlərini göstərməklə, o, cari hesabındakı vəsaitdən yaxud kassadakı puldan istifadə edə bilər.

Təhtəlhesab şəxs maddi-məsul işçidir, müvafiq qaydada avans hesabatı vermədikdə və sənədlərlə təsdiq olunmayan xərcləri qaytarmadıqda, avans məbləği işəgötürən tərəfindən:

• işçinin əməkhaqqısından tutacaq, yaxud;
• bərpası məhkəmə vasitəsi ilə təmin ediləcək.

Ezamiyyə üçün avans necə verilir?

Təhtəlhesab məbləğlər işçinin ərizəsi, yaxud da kassa məxaric orderi vasitəsilə verilir. Hər iki halda sənədlərdə müəssisə rəhbərinin razılığını təsdiq edən imza, habelə baş mühasibin imzası mütləqdir.

Təhtəlhesab şəxslərin xərcləri şirkətin işi ilə bağlı olmalıdır. Bu formada əməkhaqqı vermək, nağdlaşdırma, maddi yardım vermək olmaz.

Xərcləri kim təsdiqləyir?

Ezamiyyə yaxud digər hallarda avans vəsaitin verilməsi təşəbbüskarı rəhbərlik yaxud işçi ola bilər. Birinci halda rəhbərlik tərəfindən verilən əmrdə pulun:

• kimə;
• nəyə;
• nə qədər müddətə;
• hansı məbləğdə verilməsi müəyyən edilir.

Əks halda işçi sərbəst formada ərizə yazır, rəhbər yuxarıdakı məlumatları təsdiq etməklə imzalayır.

Avans hesabatı

Avans hesabatı təyinatından asılı olaraq 5 iş günü ərzində mühasibatlığa təqdim edilməlidir. Məbləğin xərclənməyən hissəsi isə kassaya qaytarılmalıdır. Eyni şəxsə təkrar pul avansının verilməsi keçmiş avans hesabatının təqdim edilməsindən sonra təmin edilə bilər. Təhtəlhesab şəxslərlə hesablaşmalarda ezamiyyə xərcləri xüsusi yer tutur. Ezamiyyət zamanı işçiyə nəqliyyat, kommunal və gündəlik yeməklə əlaqədar bütün xərclər müəssisə rəhbəri tərəfindən ödənilir. Təhtəlhesab şəxs ezamiyyətdən qayıtdıqdan sonra 3 iş günü ərzində avans hesabatını hazırlayaraq mühasibatlığa təhvil verməlidir. Həmin avans hesabatı, ona əlavə edilmiş ezamiyyə vəsiqəsi, digər lazımi sənədlər mühasibatlıq tərəfindən yoxlanılır və müəssisə rəhbəri tərəfindən təsdiq edilir. Hazırlanmış avans hesabatı əsasında təhtəlhesab şəxslə haqq-hesab aparılır. Ola bilər ki, məbləğ xarici valyuta ilə verilsin. Bu halda haqq-hesabın aparılması AR Mərkəzi Bankın məzənnəsinə uyğun olaraq manatla həyata keçirilir.

Təhtəlhesab şəxs tərəfindən avans hesabatının müəyyən olunmuş vaxtda təqdim edilməsi, həmçinin verilmiş pul avansının istifadə edilməmiş hissəsinin kassaya geri qaytarılması zəruridir. Əks halda qanunvericiliyə uyğun olaraq həmin borc işçinin əməkhaqqısından tutula bilər. Əgər işçi sənədlərlə təsdiq olunmaq şərtilə ona verilmiş avans məbləğindən artıq xərcləmiş olarsa, yenidən haqq-hesab aparılaraq qalıq məbləğ işçiyə ödənilməlidir. Avans hesabatında:

• müəssisənin adı;
• işçinin, adı, soyadı və atasının adı;
• hesabatın N-si, tarixi, təyinatı;
• avans məbləği;
• xərclənən məbləğ (ezamiyyə zamanı yaxud digər məqsədlərə) və s. qeyd edilməlidir.

Təhtəlhesab şəxslərlə hesablaşmaların uçotu hesablar planının “Təhtəlhesab şəxslərlə hesablaşmalar” adlı hesabında aparılır.