Blog Full

İdxal zamanı daxil olan malların yük gömrük bəyannaməsi (YGB) və qısa idxal yük gömrük bəyannamələri haqqında vergi orqanına məlumat verilməlidirmi?

İqtisadiyyat Nazirliyi yanında Dövlət Vergi Xidmətindən bildirilib ki, Vergi Məcəlləsinin 16.1.11-11-ci maddəsinə əsasən, neft-qaz sahəsində fəaliyyəti olan və ya dövlət sektoruna aid edilən, habelə “Yaşıl dəhliz” buraxılış sistemindən istifadə edən vergi ödəyiciləri istisna olmaqla, digər vergi ödəyiciləri tərəfindən idxal ediləcək mallar barədə müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilən formada aşağıdakı məlumatları malların gömrük nəzarətindən çıxdığı vaxtadək (hava nəqliyyatı ilə daşınan malların gömrük nəzarətindən çıxdığı vaxtdan 1 iş günü müddətində) uçotda olduğu vergi orqanına vermək vergi ödəyicilərinin vəzifələrinə aid edilir.

Vergi ödəyiciləri təqdim etdikləri məlumatda mülkiyyət, icarə və ya digər əşya hüquqları əsasında istifadə edilən və (və ya) vergi orqanlarında təsərrüfat subyekti (obyekti) kimi uçota alınmış malların saxlanılacağı (boşaldılacağı) yer barədə, mallar digər şəxslərə məxsus yerlərdə məsuliyyətli mühafizəyə və ya saxlanca verildiyi halda tərəflər arasında bağlanmış müqavilə və malların saxlanma yeri barədə, mallar sifariş əsasında gətirildiyi halda isə sifariş verən şəxslər barədə (sifarişçi vergi ödəyicisi olduqda VÖEN-i, fiziki şəxs olduqda adı, soyadı, atasının adı və FİN-i) və hər bir sifarişçi üzrə sifarişin məbləği barədə məlumatları qeyd etməlidir.

Vergi ödəyicisinin vergi orqanında uçota alınmış bir təsərrüfat subyekti (obyekti) olduğu halda bu maddədə nəzərdə tutulan məlumat forması vergi orqanına təqdim edilmir. Bu halda idxal edilmiş mallar həmin təsərrüfat subyektinə (obyektinə) boşaldılmış hesab olunur.

Nəzərinizə çatdırırıq ki, Vergi Məcəlləsinin 57.5-ci maddəsinə əsasən, idxal edilmiş mallar barədə bu Məcəllənin 16.1.11-11-ci maddəsində göstərilən məlumatları təqdim etməyən və ya təhrif olunmuş formada təqdim edən vergi ödəyicisinə müvafiq olaraq idxal edilmiş malların hesab-faktura (invoys) dəyərinin və ya onun təhrif olunmaqla təqdim edilmiş hissəsinin mikro sahibkarlıq subyektlərinə münasibətdə 2 faizi miqdarında, digər şəxslərə münasibətdə 5 faizi miqdarında maliyyə sanksiyası tətbiq edilir.

Əsas: Vergi Məcəlləsinin 16-cı, 57-ci maddələri.

Mənbə: vergiler.az

Ölkəmizdə mühasiblərin əmək fəaliyyətinin inkişaf etdirilməsi məqsədi ilə Peşəkar Mühasib Sertifikatı (PMS) imtahanlarında təkmilləşdirmələr davam etdirilir. Bakı Karyera Mərkəzinin direktoru, vergi eksperti Təhməz Qaçayev imtahanda sadələşdirilmiş vergi ilə bağlı verilən sualların mahiyyətini izah edir.

Sadələşdirilmiş vergi ilə bağlı sualda təqdim olunan cədvəldə iştirakçılardan tələb olunan cavablar “vergitutma obyekti”, “vergitutma bazası” və “sadələşdirilmiş verginin məbləği” ilə bağlıdır.
Vergitutma obyekti və vergitutma bazası vergitutmanın əsas elementlərindən olmaqla, Vergi Məcəlləsinin 12-ci maddəsi ilə müəyyən olunur. Qısaca desək, vergitutma obyekti – verginin yaranma mənbəyi, vergitutma bazası isə vergitutma obyektinin vergi tutulan hissəsinin kəmiyyətlə ifadəsidir.

Misal: Sadələşdirilmiş vergi ödəyicisinin 1-ci rübdə əməliyyatları aşağıdakı kimidir:

Malların təqdim edilməsi üzrə 25.000 manat;

İstiqrazlar üzrə gəliri – 800 manat;

Dövlət büdcəsinə olan vergi borcunun bağışlanılmasından gəliri – 500 manat.

Təqdim edilən malların dəyərinin 2.000 manatı hesabat dövründə ödənilməyib.

Burada vergitutma obyekti, vergitutma bazası və sadələşdirilmiş vergi məbləğinin tapılması tələb olunur.

İlk növbədə vergitutma obyektini müəyyən edək. Vergi Məcəlləsinin 219.1-ci maddəsinə əsasən, sadələşdirilmiş vergi ödəyiciləri üçün vergitutma obyekti – malların (iş və xidmətlərin), əmlak təqdim olunmasından əldə olunan ümumi hasilat və satışdan kənar (ödəmə mənbəyində vergi tutulanlar istisna olmaqla ) gəlirlərdir.

Misalımızda təqdim edilən malların dəyəri 25.000 manat olsa da 2000 manat hesabat dövrü üzrə ödənilmədiyi üçün hasılat 23.000 manat qəbul edilir:

25000 – 2000 = 23000 manat.

İstiqrazlardan (800 manat) və dövlət büdcəsindən vergi borcunun bağışlanılması (500 manat) gəliri isə satışdan kənar gəlir kimi vergitutma obyekti hesab edilir. Beləliklə, vergitutma obyekti olan vəsaitlər ümumilikdə 24.300 manatdır:

23000 + 800 + 500 = 24300 manat.

Vergitutma bazası isə vergitutma obyektinin vergi tutulan hissəsi olduğu üçün vergitutma obyektindən azad olan hər hansı gəlir növünü çıxmalıyıq. Vergi Məcəlləsinin 218-1-ci maddəsinə əsasən, misalımızda dövlət büdcəsinə vergi borcunun bağışlanılması üzrə gəlir (500 manat) vergidən azad edilir.

Vergitutma bazası: 24300 – 500 = 23800 manat.

Sadələşdirilmiş verginin dərəcəsi isə 2%-dir.

Sadələşdirilmiş verginin məbləği: 23800 x 2% = 476 manat.

Mənbə: vergiler.az

28 iyun 2024-cü il tarixli Azərbaycan Respublikasının Qanunu ilə Əmək Məcəlləsində, Vergi Məcəlləsində və bir sıra qanunvericilik aktlarında edilmiş dəyişikliklərdə əmək müqavilələrinin elektron informasiya sistemi üzərindən elektron sənəd formasında bağlanılması, işçi və işəgötürən tərəfindən gücləndirilmiş elektron imza ilə imzalandıqdan sonra hüquqi qüvvəyə minməsi məsələləri öz əksini tapıb. Əmək müqavilələrinə dəyişikliklərin edilməsi və xitam verilməsi kimi əməliyyatların da elektron informasiya sistemi üzərindən həyata keçirilməsi nəzərdə tutulub.

Qeyd olunan əməliyyatların yerinə yetirilməsi üçün işəgötürənlə yanaşı, işçilərin də gücləndirilmiş elektron imzaya sahib olmaları zəruridir. Azərbaycan vətəndaşları, fərdi sahibkarlar və Azərbaycanda qanuni əsaslarla fəaliyyət göstərən əcnəbilər əmək müqavilələrini “Vətəndaş” tipli Asan İmzadan, həmçinin SİMA İmzadan istifadə edilməklə ödənişsiz şəkildə imzalaya bilərlər. Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi, təşkilatın səlahiyyətli nümayəndələri tərəfindən əməkdaşlarla imzalanan əmək müqavilələri haqqında məlumatların işçilər tərəfindən əldə edilməsi mümkündür.

Əməyin Məşğulluğu Alt Sistemi (ƏMAS) platformasında əmək müqavilələrinin onlayn şəkildə imzalanması vətəndaşların vaxtına və vəsaitinə qənaət etməsi üçün şərait yaradır, “Yaşıl dünya naminə həmrəylik ili” çərçivəsində növbəti önəmli addım olmaqla, kağız daşıyıcılarından istifadəni xeyli azaldır.

Mənbə: vergiler.az