Blog Full - Muhasibat.Az

Oxunma sayı: 152. 044

9 Sen 2025

Fərdi qaydada fəaliyyət göstərən vəkil və vəkil bürosunun vergi öhdəlikləri: QAYDALAR, MƏBLƏĞLƏR

by muhasibat az | posted in: Xəbər | 0

Vergi Məcəlləsinin 99.3.11-ci maddəsinə əsasən, vəkillik fəaliyyəti ilə məşğul olan şəxslərin göstərdikləri xidmətə görə alınan ödənişlər qeyri-sahibkarlıq fəaliyyətindən əldə edilən gəlirlər qrupuna aiddir. Məcəllənin 101.2-ci maddəsində isə göstərilib ki, qeyri-sahibkarlıq fəaliyyəti üzrə illik gəlirdən 14 faiz dərəcəsi ilə vergi tutulur.

Bu qaydaları “BSC Business Service Centre” şirkətinin maliyyə-mühasibatlıq işləri üzrə mütəxəssisi Vüsal Bayramlı şərh edir.

Vergi Məcəlləsinin normalarından göründüyü kimi, vəkillik fəaliyyətindən əldə edilən gəlir qeyri-sahibkarlıq fəaliyyətinə aid olduğu üçün vəkillər gəlir vergisi ödəyiciləridir. Fərdi qaydada fəaliyyət göstərən vəkillər, Vergi Məcəlləsinin 101-ci maddəsinə əsasən, qeyri-sahibkarlıq fəaliyyəti üzrə illik gəlirdən 14 faiz dərəcəsi ilə vergi ödəyirlər.

Azərbaycan qanunvericiliyinə görə, vəkillərin fəaliyyəti “Vəkillər və vəkillik fəaliyyəti haqqında” Qanun və Vergi Məcəlləsi əsasında tənzimlənir. Həmin şəxslərin vergi və sosial öhdəlikləri fəaliyyət formasından – fərdi qaydada və ya vəkil bürosu tərkibində işləməsindən asılı olaraq dəyişir.

1. Fərdi qaydada fəaliyyət göstərən vəkilin əsas gəliri

Vəkil fərdi sahibkar (fiziki şəxs) kimi qeydiyyatdan keçmir, çünki vəkillik fəaliyyəti sahibkarlıq sayılmır. Onun əsas gəlir mənbəyi göstərdiyi hüquqi yardımdan əldə etdiyi qonorardır.

Vergi Məcəlləsinə əsasən, vəkil gəlirlərindən gəlir vergisi ödəməlidir: 2.500 manatadək aylıq gəlirdən 14%, 2.500 manatdan yuxarı hissədən isə 25% vergi tutulur.

Misal 1: Fərdi qaydada fəaliyyət göstərən vəkilin aylıq gəliri 3.000 manat olarsa, onun vergi öhdəliyi aşağıdakı kimi hesablanır:

2.500 x 14% = 350 manat;
3.000 – 2.500 = 500 manat;
500 x 25 % = 125 manat;
Cəmi vergi öhdəliyi: 350 + 125 = 475 manat.

“Tibbi sığorta haqqında” Qanunun 15-2.2.2-ci maddəsinə əsasən, Vergi Məcəlləsinə uyğun olaraq, sahibkarlıq fəaliyyətinin və ya digər vergi tutulan əməliyyatlarının müvəqqəti dayandırıldığı hallar istisna olmaqla, vergi ödəyicisi kimi vergi uçotuna alınmış fiziki şəxslər (fərdi sahibkarlar, xüsusi notariuslar, Vəkillər Kollegiyasının üzvləri, mediatorlar) sığortalı qismində özləri çıxış edirlər. Həmin Qanunun 15-10.1.3-cü maddəsində isə göstərilib ki, bu Qanunun 15-2.2.2-ci maddəsində nəzərdə tutulmuş sığortaolunanlar üzrə aylıq sığorta haqqı minimum aylıq əməkhaqqının 4 faizi məblğində müəyyən edilib.

Vəkillər, eyni zamanda, məcburi dövlət sosial sığorta haqqı da ödəməlidirlər. “Sosial sığorta haqqında” Qanunun 14.5.5-ci maddəsinə əsasən, Vəkillər Kollegiyasının üzvləri 2026-cı il yanvarın 1-dək gəlirlərinin (xərclər çıxılmaqla) 10 faizi miqdarında sosial siğorta ödəməlidirlər.

Misal 2: Fərz edək vəkillik xidməti göstərən fiziki şəxs iyul ayı ərzində müştərilərdən 5.000 manat gəlir əldə edib. Ay ərzində müxtəlif xərcləri isə (ofis icarəsi, kargüzarlıq, nəqliyyat və s.) 1.500 manat təşkil edib. Bu halda, onun sosial ödəmələrini hesablayaq:

Xalis gəlir: 5.000 – 1.500 = 3.500 manat;
Məcburi dövlət sosial sığorta haqqı (10%): 3.500 x 10% = 350 manat;
İcbari tibbi sığorta haqqı: 400 x 4% = 16 manat.

2. Vəkil bürosunun öhdəlikləri

Vəkil bürosu hüquqi şəxs statusuna malik deyil, lakin ümumi uçot aparır. Hər bir vəkil öz payına düşən gəlirə görə ayrıca vergi ödəyir. Büro qonorarları kassaya qəbul edir və bölüşdürür. Bu zaman şəffaf uçot tələbləri çox sərtdir.

Misal 3: Vəkil bürosuna ay ərzində 20.000 manat vəsait daxil olub. Tutaq ki, burada 4 vəkil fəaliyyət göstərir. Bərabər bölgü zamanı hər vəkilin gəliri 5.000 manat olacaq:

20.000 : 4 = 5.000 manat.

Bu zaman hər bir vəkil yuxarıdakı gəlir vergisi və sosial ödənişləri öz adına ödəyir:

5.000 – 2.500 = 2.500 manat;
2.500 x 14% = 350 manat;
2.500 x 25% = 625 manat.
Cəmi vergi öhdəliyi: 350 + 625 = 975 manat;
MDSS öhdəliyi: 5.000 x 10% = 500 manat;
İTS öhdəliyi: 400 x 4% = 16 manat.

Vəkil bürosunda işləyən texniki əməkdaşlar və s. isə müvafiq əmək müqaviləsi ilə işə olunur. Onların əməkhaqqından 14% gəlir vergisi, 3% işsizlik sığortası, 25% MDSS ayırmaları (əməkhaqqı fondundan) tutulur və ödənilir.

Mənbə: vergiler.az

621 saylı “Fəaliyyətin dayandırılmasından yaranan gəlirlər” hesabında uçotun əsas prinsipləri

8 Sen 2025

Digər təxirə salınmış vergi aktivlərı – 162-ci hesab üzrə uçot

by muhasibat az | posted in: Uncategorized, Xəbər | 0

Mühasibat uçotunda təxirə salınmış vergi aktivlərinin uçotu üçün Hesablar Planının “Uzunmüddətli aktivlər” bölməsinin 16-cı maddəsinə aid olan aşağıdakı hesablardan istifadə olunur:

161 saylı “Mənfəət vergisi üzrə təxirə salınmış vergi aktivlərı” hesabı;
162 saylı “ Digər təxirə salınmış vergi aktivlərı” hesabı.

Bu məqalədə 162-ci hesabda uçot haqqında məlumatlar veriləcək, onun dair nümunələr təqdim ediləcək.

Təxirə salınmış vergi aktivləri nədir?

Təxirə salınmış vergi aktivləri şirkətin gələcəkdə ödəyəcəyi vergi məbləğlərinin azalmasına səbəb olacaq, lakin indiki dövrdə tanınan aktivlərdir. Başqa sözlə, bu aktivlər keçmişdə baş vermiş əməliyyatlar nəticəsində yaranır və gələcəkdə vergi azalmaları şəklində şirkətə fayda verəcək potensialı ifadə edir. Bu aktivlər mühasibat standartları ilə (maliyyə hesabatlarında) tanınan gəlir və xərclər ilə vergi qanunvericiliyi əsasında gəlirlərin tanınması və xərclərin çıxılması ilə bağlı vergi uçotunda (vergi bəyannamələrində) tanınan gəlir və xərclər arasındakı yğunsuzluqlardan yaranan fərqlərdir. Bu fərqlər bir hesabat dövründə yaranır və gələcək hesabat dövrlərində aradan qalxır, odur ki, onlar əsasən müvəqqəti xarakter daşıyır, yəni onlar bir dövrdə yaranıb gələcək dövrlərdə geri dönür.

Müvəqqəti fərqlərin yaranması təxirə salınmış vergi aktivləri ilə necə əlaqəlidir?

Müvəqqəti fərqlər və təxirə salınmış vergi aktivləri bir-birinə sıx bağlı anlayışlardır. Mövcud hesablar planına uyğun olaraq 161 (“Mənfəət vergisi üzrə təxirə salınmış vergi aktivlərı”) və 162 saylı (“Digər təxirə salınmış vergi aktivlərı”) hesablarında uçota alınan təxirə salınmış vergi aktivləri, əslində, müvəqqəti fərqlərin bir növ nəticəsidir. Belə ki, yuxarıda qeyd etdiyimiz kimi, təxirə salınmış vergi aktivləri, çıxıla bilən müvəqqəti fərqlər mövcud olduqda yaranır, yəni o, müəyyən gəlir və ya xərclər cari dövrdə mühasibat uçotunda fərqli, vergi uçotunda isə fərqli qaydalarla tanındığı üçün yaranan “kredit” kimi bir vəziyyətdir.

Vergi krediti (ing.: tax credit) — vergi ödəyicilərinin ödəməli olduqları vergilərdən birbaşa çıxılan məbləğdir. Vergi krediti adətən dövlətin müəyyən iqtisadi, sosial və ya ətraf mühitlə bağlı siyasətlərini dəstəkləmək üçün nəzərdə tutulan güzəştləri özündə birləşdirir.

Bunu bir nümunə ilə izah edək:

Müəssisə 2024-cü ildə təhlükəsizlik avadanlıqlarının alınması üçün dövlət proqramı çərçivəsində 2,500 AZN “vergi kreditinə sahib olub. Lakin həmin il müəssisənin mənfəəti az olub və bu kreditin yalnız 1,000 AZN-lik hissəsi istifadə olunub. Qalan 1,500 AZN gələcək illərə keçirilir. Vergi dərəcəsi 20%-dir. Bu kredit gələcəkdə mənfəət vergisindən çıxılacaq Bu halda 1,500 AZN-lik istifadə olunmamış vergi krediti əsasında təxirə salınmış vergi aktivi tanınır

162 saylı hesab hansı hallarda istifadə olunur?

161 saylı “Mənfəət vergisi üzrə təxirə salınmış vergi aktivləri” hesabının təyinatı, əməliyyatların tərkibi, müxabirləşmələrin verilməsi, uyğun subhesabların açılması AR MN kollegiyasının Q-01 №-li “Maliyyə Hesabatlarının Beynəlxalq Standartlarına əsasən mühasibat uçotunun aparılması Qaydaları” ilə tənzimlənir.

Bu hesabda mühasibat uçotu subyektinin fəaliyyətinin həyata keçirilməsi zamanı digər təxirə salınmış vergi aktivləri barədə ümumiləşdirilmiş məlumatlar əks etdirilir. (Qaydalar, bənd 17.5).

“Digər təxirə salınmış vergi aktivlərı ” hesabı üzrə tənzimləmələr

Hesab üzrə mühasibat yazılışları verilərkən:

qaydaların 17.6 bəndinin (Digər təxirə salınmış vergi aktivlərinin hesablanması zamanı müxabirləşmələr), habelə;
qaydaların 17.7 bəndinin ( Vergi Məcəlləsinin tələblərinə əsasən hesablanmış vergi öhdəliyi) tələbləri nəzərə alınır.

Bu hesabın debetinə aktivlərin tanınması, kreditinə isə onların silinməsi (istifadə edilməsi) yazılır.

Təxirə salınmış vergi aktivlərinin tanınma meyarları 12 saylı “Mənfəət vergisi” adlı Mühasibat Uçotunun Beynəlxalq Standartı (MUBS 12 – İAS12) əsasında aparılır.

Praktiki nümunə və mühasibat yazısı

Digər təxirə salınmış vergi aktivlərinin uçotu üzrə müxabirləşmələri 711, 162, 521 saylı hesabların iştiakı ilə nümunədə izah edək.

İştirak edən hesablar:

Hesab №	Hesabın adı	Təyinatı
711	Kommersiya xərcləri	Satışla əlaqədar xərclər (reklam, daşınma, amortizasiya və s.)
162	Digər təxirə salınmış vergi aktivləri	Vergi uçotunda gələcəkdə nəzərə alınacaq müvəqqəti fərqlər üzrə aktivlər
521	Vergi öhdəlikləri	Müəssisənin vergi orqanları qarşısında cari və gələcək öhdəlikləri

Mühasibat prosesi: Təxirə salınmış vergi aktivlərinin mərhələli uçotu

1-ci mərhələ: Xərcin yaranması

Əməliyyat: “MikrobioLab” MMC kommersiya məqsədilə 1500 AZN amortizasiya xərci qeydə alır. Mühasibat yazılışı:

Əməliyyat	Debit	Kredit	Məbləğ	Qeyd
Amortizasiya xərcinin tanınması	711: Kommersiya xərcləri	112: Torpaq, tikili və avadanlıqlar üzrə yığılmış amortizasiya və qiymətdəndüşmə zərərləri	1500	Amortizasiya xərci

Bu xərclər mühasibat uçotunda tanınsa da, vergi uçotunda tanınmır (məsələn, aktiv hələ istifadəyə verilməyib). Müvəqqəti fərq yaranır.

2-ci mərhələ: Təxirə salınmış vergi aktivinin tanınması

Müvəqqəti fərq: 1,500 AZN, vergi dərəcəsi: 20%, təxirə salınmış vergi aktivinin məbləği: 1,500 × 20% = 300 AZN. Mühasibat yazılışı:

Əməliyyat	Debit	Kredit	Məbləğ	Qeyd
Təxirə salınmış vergi aktivinin tanınması	162: Digər təxirə salınmış vergi aktivləri	521: Vergi öhdəlikləri	300	Müvəqqəti fərqə görə vergi

Bu mərhələdə müəssisə gələcəkdə bu fərqin vergi öhdəliyini azaldacağını gözlədiyi üçün 162 hesabında aktiv yaradır.

3-cü mərhələ: Təxirə salınmış aktivdən istifadə

Gələcək dövrdə bu xərclər vergi uçotunda da tanınır. Bu zaman əvvəlki aktiv silinir, vergi öhdəliyinə təsir edir. Mühasibat yazılışı:

Əməliyyat	Debit	Kredit	Məbləğ	Qeyd
Təxirə salınmış vergi aktivdən istifadə	711: Kommersiya xərcləri	521: Vergi öhdəlikləri	300	Xərclər vergi uçotunda da tanınır
Təxirə salınmış vergi aktivdən istifadə	521: Vergi öhdəlikləri	162: Digər təxirə salınmış vergi aktivləri	300	Əvvəlki aktiv silinir

Əvvəllər uçota alınmış təxirə salınmış vergi aktivindən istifadə olunur.

8 Sen 2025

Azərbaycanda Peşəkar Mühasib Sertifikatı əldə edənlərin sayı nə qədərdir?

by muhasibat az | posted in: Xəbər | 0

Azərbaycanda Peşəkar Mühasib Sertifikatı (PMS) əldə edənlərin sayı 5 749 nəfərə çatıb.

Bu barədə Maliyyə Nazirliyinə istinadən xəbər verilir.

Məlumata görə, PMS almış şəxslərin dövlət reyestri yenilənərək Maliyyə Nazirliyinin rəsmi internet səhifəsində yerləşdirilib.

Xatırladaq ki, Dövlət İmtahan Mərkəzi (DİM) bu ilin iyul ayında peşəkar mühasib sertifikatı imtahanının I mərhələsi (mühasibat uçotu üzrə), avqust ayında isə II mərhələsi (qanunvericilik üzrә) keçirilib. İmtahan vermək üçün I mərhələ üzrə 1 416, II mərhələ üzrə isə 984 nəfər müraciət etmişdi.

Mənbə: report.az

Peşəkar Mühasib Sertifikatı imtahanına hazırlıq kursları

8 Sen 2025

741 saylı “Fəaliyyətin dayandırılmasından yaranan xərclər” hesabında uçotun əsas prinsipləri

by muhasibat az | posted in: Xəbər | 0

Bu məqalədə iri şitkətlərin, holdinqlərin ayrı-ayrı seqmentlərində fəliyyətin dayandaırlıması zamanı yaranan xərclərin Hesablar Planının 741 saylı “Fəaliyyətin dayandırılmasından yaranan xərclər” hesabında uçotunun əsas prinsipləri şərh olunur.

Şirkətin fəaliyyət seqmentləri

Şirkətin fəaliyyət seqmentləri – müəssisənin müxtəlif istiqamətlər üzrə gördüyü işlərin ayrı-ayrılıqda təsnifidir. Bu seqmentlər məhsul və xidmət növlərinə, fəaliyyət regionlarına və ya müştəri qruplarına görə müəyyən edilə bilər.

Mühasibatlıqda fəaliyyət seqmentləri üzrə uçot hər bir sahənin gəlirliliyini, xərclərini və risklərini ayrıca qiymətləndirməyə imkan verir. Nəticədə rəhbərlik hansı istiqamətin daha səmərəli olduğunu görərək düzgün qərarlar qəbul edə bilir.

Fəaliyyətin seqmentləşməsinə aşağıdakı nümunələri göstərmək olar:

istehsal seqmenti – məhsul istehsalı və istehsal xərclərinin uçotu;
satış seqmenti – məhsulların topdansatış və pərakəndə satışından gəlir və xərclər;
xidmət seqmenti – müştərilərə göstərilən əlavə xidmətlər (məsələn, servis, texniki dəstək);
regional seqment – Bakı, Gəncə və ya digər regionlarda fəaliyyət nəticələrinin ayrıca uçotu.

8 saylı “Əməliyyat seqmentləri” adlı MHBS (IFRS8) şirkətlərdən maliyyə hesabatlarında əsas seqmentlərin maliyyə göstəricilərini açıqlanmasını tələb edir. Bu, həm daxili idarəetmə, həm də investorlar üçün şəffaflıq üçün lazımdır. Hesabatlarda əks etdirmək məqsədi ilə mühasibatlıqda belə məlumatların ümumiləşdirilməsi üçün bir sıra hesablardan istifadə edilir ki, onlardan biri də 741 saylı “Fəaliyyətin dayandırılmasından yaranan xərclər” hesabıdır.

Mühasibat uçotu baxımından

Şirkətlərin fəaliyyətində müəyyən seqmentin dayandırılması həm strateji idarəetmə, həm də mühasibat uçotu baxımından vacib prosesdir. Belə qərarın verilməsinə bir sıra səbəblərdən ola bilər, məsələn;

seqmentin rentabelliyinin azalması;
bazar şərtlərində dəyişiklik;
rəqabət üstünlüklərinin itirilməsi;
sahənin şirkətin uzunmüddətli strategiyasına uyğun olmaması.

İstehsal, satış və xidmət istiqamətlərində fəaliyyət göstərən bir şirkət xidmət seqmentində gəlirlərin azalması və xərclərin artması səbəbindən həmin sahəni dayandıra bilər. Bu zaman əsas resurslar istehsal və satış seqmentlərinin gücləndirilməsinə yönəldilir. Mühasibat uçotu baxımından dayandırılmış seqment üzrə gəlir və xərclər ayrıca uçota alınmalı, maliyyə hesabatlarında davam edən fəaliyyətlərdən aydın şəkildə ayrılmalıdır. Bunun üçün Hesablar Planın aşağıdakı hesablar nəzərdə tutulub:

621 saylı “Fəaliyyətin dayandırılmasından yaranan gəlirlər” hesabı;
741 saylı “Fəaliyyətin dayandırılmasından yaranan xərclər” hesabı.

Seqmentin fəaliyyətinin dayandırılması şirkətin ümumi fəaliyyətinə təsir göstərdiyindən, bu addım şəffaf hesabat və düzgün uçot tələbləri ilə müşayiət olunur.

Fəaliyyətin dayandırılmasından yaranan xərclər

Şirkətin hər hansı fəaliyyət seqmentinin dayandırılması bir sıra əlavə xərclərlə müşayiət olunur. Bu xərclərə aşağıdakıaları aid etmək olar:

işçilərə ödənilən kompensasiyalar;
müqavilələrin vaxtından əvvəl ləğvinə görə cərimələr;
aktivlərin satış və ya utilizasiya xərcləri;
inventar qalıqlarının silinməsi və sair bu kimi digər xərclər.

Mühasibat uçotu baxımından bu tip xərclər 741 saylı “Fəaliyyətin dayandırılmasından yaranan xərclər” hesabında ayrıca uçota alınır və maliyyə hesabatlarında davam edən fəaliyyətlərin nəticələrindən fərqli göstərilir.

“Satış üçün saxlanılmış uzunmüddətli aktivlər və dayandırılmış əməliyyatlar” adlı (IFRS 5) 5 saylı MHBS-a görə də dayandırılmış fəaliyyətlər müstəqil açıqlanmalı və onların maliyyə nəticələri hesabatlarda ayrıca göstərilməlidir. Bu, həm investorlar, həm də kreditorlar üçün şəffaflıq təmin edir və şirkətin gələcək inkişaf istiqamətlərinə dair dəqiq təsəvvür yaradır.

741 saylı hesabı üzrə tənzimləmələr

Davam edən və dayandırılmış fəaliyyətin nəticələrini fərqləndirmək üçün istifadə edilə 741 saylı “Fəaliyyətin dayandırılmasından yaranan xərclər” hesabı “Maliyyə Hesabatlarının Beynəlxalq Standartlarına əsasən mühasibat uçotunun aparılması Qaydaları” (bundan sonra -“Qaydalar”) ilə kommersiya müəssisələri üçün müəyyən edilmiş Hesablar Planının 7-cı “Xərclər” bölməsinin 74-cü maddəsinə aiddir. Qaydaların 56.1 bəndinə görə bu maddə üzrə 741 saylı “Fəaliyyətin dayandırılmasından yaranan xərclər” hesabı açılır və “mühasibat uçotu subyektinin fəaliyyətinin dayandırılması ilə əlaqədar ya silinmiş, ya da satış üçün saxlanılmış kimi təsnifləşdirilmiş komponentləri üzrə yaranmış xərcləri barədə ümumiləşdirilmiş məlumatlar” bu hesabda əks etdirlir.

Hesab üzrə təzimləmələr Qaydaların 56.2-56.5 bəndlərinin tələblərinə uyğun aparılır. Həmin tələblərə görə:

əgər fəaliyyətin dayandırılması üzrə əməliyyatlar zərərlə nəticələnərsə, bu maliyyə hesabatlarında netto əsasında (fəaliyyətin dayandırılmasından yaranan xərclərdən gəıir çıxılmaqla) təqdim edilir;
fəaliyyətin dayandırılması zamanı uzunmüddətli aktivlər satış məqsədi ilə saxlanılan digər aktivlər kimi təsnifləşdirilərək satıldıqda mühasibatlıqda uçot əməliyyatları Qaydalrın 56.2.1- 56.2.9-cu bəndlərinin tələblərinə uyğun aparılır;
fəaliyyətin dayandırılması zamanı maliyyə alətlərinin satışı üzrə uçot əməliyyatları Qaydalrın 56.3.1- 56.3.7 bəndlərinin tələblərinə uyğun aparılır.

Hər iki halda satış əməliyyatları üçün çəkilən xərclər 741 saylı “Fəaliyyətin dayandırılmasından yaranan xərclər” hesabın debiti üzrə uçota alınır;

Fəaliyyətin dayandırılmasından yaranan xərclər üzrə məbləğə Dt801/Kr 641 kimi mühasibat yazılışı verilir (Qaydaların 56.5-ci bəndi).

741 saylı hesab üzrə müxabirləşmə nümunəsi

Aşağıdakı nümunədə şirkətin hər hansı biznes seqmenin fəaliyyətinin dayandırılması zamanı mümkün mühasibat yazılışları, o cümlədən 741 saylı “Fəaliyyətin dayandırılmasından yaranan xərclər” hesabı üzrə müxabirləşmələr əks olunub.

Nümunə: “ABC” şirkəti qida məhsullarının istehsalı və satışı, kənd təsərrüfatı məhsullarının satışı ilə məşğuldur. Araşdırmalar göstərib ki, şirkət kənd təsərrüfatı məhsullarının satışı seqmentində mənfəət əldə edə bilmir. Odur ki, bu sahə üzrə fəaliyyətin dayandırılmasına qərar verilir. Fəaliyyətin dayandırılmasından yaranan xərclərin uçotu üzrə aşağıdakı müxabirləşmələr verilir.

Əməliyyatın məzmunu	Debit	Kredit	Məbləğ (manat)
K/t məhsullarının satışı fəaliyyətindən gəlirlır	–	601: “Satış”	150 000
K/T məhsullarınln satışı fəaliyyəti üzrə xərclər	701: “Satışın maya dəyəri”	–	170 000
K/t məhsullarının satışı sektoru üzrə xərclər bağlanır	601: “Satış”	701: “Satışın maya dəyəri”	170 000
Fəaliyyətin dayandırılmasından zərərlər uçota alınır	741: “Fəaliyyətin dayandırılmasından yaranan gəlirlər”	601: “Satış”	20000
Hesabat ilinin sonunda fəaliyyətin dayandırılması üzrə xərclər ümumi mənfəətlə bağlanır	801: “Ümumi mənfəət (zərər)”	741: “Fəaliyyətin dayandırılmasından yaranan xərclər”	20 000