Blog Full

Əmək və Əhalinin Sosial Müdafiəsi Nazirliyinin hazırladığı əmək və məşğulluq altsistemində (ƏMAS) işəgötürənlər üçün yeniliklər davam edir. Son dövrlərdə tətbiq edilən yeniliyə əsasən, ƏMAS-da məzuniyyət əmrlərinin hazırlanması üçün xüsusi bölmə işəgötürənlərin ixtiyarına verilib. Lakin bəzən ondan istifadə edən işəgötürənlərin sistemdəki funksionallıqla bağlı çətinlikləri yaranır.

İqtisadçı ekspert Anar Bayramov açıqlamasında elektron əmək məzuniyyəti ilə bağlı 3 vacib məqamı vurğulayıb:

“Birinci məqam odur ki, “Məzuniyyət əmrləri” bölməsində işçinin bütün növ məzuniyyətlərinin rəsmiləşdirilməsi mümkündür. İnsan resursları sahəsində çalışan mütəxəssislər əmək, təhsil, yaradıcılıq, sosial (hamiləliyə və doğuşa görə), qismən ödənişli sosial və ödənişsiz məzuniyyətlər üzrə əmr formasını ƏMAS-da hazırlamaq imkanına malik olacaq. Məzuniyyət əmrlərinin hazırlanması zamanı Əmək Məcəlləsinin 138-ci maddəsinin tələbləri gözlənilib. Həmin maddədə olduğu kimi, elektron məzuniyyət əmrində işçinin adı, atasının adı və soyadı, vəzifəsi (peşəsi), verilən məzuniyyətin növü, müddəti, müvafiq iş ili, məzuniyyətin başlandığı, qurtardığı və məzuniyyət müddəti bitdikdən sonra işçinin işə başlamalı olduğu il, ay, gün göstərilir. Bundan əlavə, əmək məzuniyyətinə əsas verən sənəd (işçinin ərizəsi, təhsil və ya tibb müəssisəsinin müvafiq sənədi və s.) haqqında məlumatların məzuniyyət əmrində qeyd edilməsi də həyata keçirilir”.

A.Bayramov bildirib ki, ikinci məqam altsistemdə beşgünlük iş rejimində məzuniyyət əmrinin tərtibi zamanı məzuniyyətin başlanma tarixinin qeyd olunması halında məzuniyyətin bitmə və işçinin işə başlama tarixinin avtomatik qeyd edilməsidir. İşəgötürən ƏMAS-da məzuniyyət günlərinin sayı və başlanma tarixini qeyd etdikdə, proqram təminatı 2024-cü ilin istehsalat təqviminə uyğun olaraq məzuniyyətin bitmə və işçinin işə başlama tarixini avtomatik olaraq müəyyənləşdirir. Sistemdə altıgünlük və digər iş rejimlərini tətbiq edən işəgötürənlər üçün məzuniyyətin bitmə və işçinin işə başlama tarixinin əl ilə (manual olaraq) daxil edilməsinə imkan da yaradılıb: “Burada üçüncü vacib məqam ƏMAS-da məzuniyyət əmrlərinin hazırlanmasının işəgötürənlər üçün mütləq tələb kimi nəzərdə tutulmamasıdır. Dövlət qurumu tərəfindən məzuniyyət əmrlərinin tərtib edilməsi prosesi işəgötürənlərə dəstək məqsədilə hazırlanıb. Əmək Məcəlləsinin 49-cu maddəsinə əsasən, əmək müqaviləsinin bağlanılması, ona dəyişiklik edilməsi və ya xitam verilməsi bununla bağlı elektron informasiya sisteminə gücləndirilmiş elektron imza vasitəsilə daxil edilmiş əmək müqaviləsi bildirişinin həmin elektron informasiya sistemində qeydiyyata alınmasından və bu barədə işəgötürənə elektron qaydada məlumat göndərilməsindən sonra hüquqi qüvvəyə minir. Maddədən göründüyü kimi, məzuniyyət əmrlərinin elektron informasiya sistemində qeydiyyata alınması qanunvericilikdə nəzərdə tutulmayıb. Yəni işəgötürən məzuniyyət əmrlərini kağız və (və ya) ƏMAS üzərindən elektron formada hazırlamaqda sərbəstdir”.

A.Bayramov işəgötürənlərə məzuniyyət əmrlərini ƏMAS-da hazırlamağı tövsiyə edib. Onun sözlərinə görə, yaxın gələcəkdə kadr kargüzarlığı ilə bağlı əməliyyatların elektronlaşdırılması prosesinə tam keçidin yekunlaşdırılması və həmin prosesin məcburiliyinin qanunvericiliklə tənzimlənməsi gözlənilir.

Bəzi hallarda işəgötürənlər və ya onların insan resursları bölməsini idarə edən şəxslər məzuniyyət əmrlərini elektron sistemə daxil edərkən yanlışlıqlara yol verirlər. ƏMAS-ın mövcud funksiyaları isə onu dərhal düzəltməyə imkan vermir. Yanlışlıq düzəlmədikcə digər əmrlərin elektron sistemə daxil edilməsi də ləngiyir. Bəs bu halda işəgötürənlər necə davranmalıdır?

Sualımıza Dövlət Əmək Müfəttişliyinin Risklərin idarəedilməsi və elektron audit şöbəsinin müdir muavini, ƏMAS-a nəzarət sektorunun müdiri Aynurə Tağıyeva aydınlıq gətirib. Onun sözlərinə görə, məzuniyyət əmrlərinin elektron informasiya sistemində qeydiyyata alınması qanunvericiliyin tələbi deyil. Bu, sadəcə, ƏMAS-ın funksionallığının artırılmasıdır: “Sistemdə yaranan hər hansı texniki yanlışlıqla bağlı Dövlət Əmək Müfəttişliyi Xidmətinə rəsmi müraciət ünvanlanmalıdır. Onun əsasında həmin xətanın silinib-silinməməsi ilə bağlı məsələyə toplanmış sənədlər əsasında 15 gün müddətində baxılır. Əlavə araşdırma tələb olunarsa, müddət daha 15 gün uzadıla bilər. Hazırkı şəraitdə elektron sistemdə məzuniyyət əmrinin yerləşdirilməsində ortaya çıxan yanlışlıq digər əmrlərin verilməsində məhdudiyyət yaratmır. İşəgötürən digər işçilərin hüquqlarını məhdudlaşdırmadan kağız üzərində növbəti əmrləri hazırlayıb imzalaya bilər. Qanunvericilik də bunu tələb edir”.

Mənbə: vergiler.az

Mühasibat uçotu məlumatları biznesin idarə edilməsində əhəmiyyətli rola malikdir. Uçot məlumatlarının maraqlı tərəfləri müxtəlifdir. Bu məqalədə onlar haqqında danışacağıq.

Uçot qeydlərinin aparılmasının əhəmiyyəti nədir?

Uçot qeydlərinin aparılması, mühasibat uçotu məlumatları, onların maraqlı tərəflər üçün əhəmiyyətini daha yaxşı anlamaq üçün bir nümunəyə baxaq. Fərid və Fəridənin kiçik ailə biznesi var. Fərid müxtəlif təchizatçılardan – topdansatış müəssisələri, fərdi sexlər və digər dükanlardan müxtəlif növ şirniyyat alır. Fəridə isə onları münasib qiymətə dükanda satır. Fərid şəxsi istehlak məqsədi ilə – çay süfrəsi arxasında istifadə etmək üçün dükandan şirniyyat götürür. Fəridə isə evdə – stolun üstündə müxtəlif şirniyyatların olmasını sevir, yaxın saydığı insanlara isə onları daha aşağı qiymətlərlə satır.

Dükanın yaxınlığında fəaliyyət göstərən 2 kafe və 3 çay evi onların daimi və əsas müştəriləridir.

Onlar fəaliyyətləri üzrə uyğun hesabatları vermək üçün ailə dostunun yardımından yararlanırlar. O, əsas müştərilərin təqdim etdikləri sənədlər üzrə hesabatları hazırlayır. Amma bu zaman bütün əməliyyatlar üzrə qeydlər aparılmır. Bu cür hesabatlıq və günün sonunda kassada müəyyən məbləğdə pul vəsaitlərinin qalması Fərid və Fəridəni qane edir.

İlin  sonunda  dükanın  təchizatı  üçün  aldıqları  malların  qiyməti  kəskin  artır.  İl  ərzində apardıqları qiymət siyasəti onlara satış qiymətini topdansatış qiymətlərinə uyğun qaldırmağa imkan vermir – bu, bir çox müştərilərin itirilməsinə səbəb olacaq. Problemin həlli üçün 2 variant mövcuddur:

1. Ötən dövrü təhlil etmək və biznesə fərqli yanaşma ortaya qoymaq;
2. Əgər gəlirliliyi təmin etmək olmasa, onda dükanı satmaq. Tanışlardan dükanı almaq istəyən var, amma o, ötən dövrdə nə qədər mənfəət əldə edildiyin bilmək istəyir.

Hər iki variant ötən dövrü əhatə edən bütün xərc və gəlirlər haqqında məlumatın mövcudluğunu tələb edir. Bunu isə onlar edə bilməyəcək, çünki:

• il ərzində aparılan alqı-satqı əməliyyatları, xərclər və digərləri tam qeydə alınmayıb;
• 5 əsas müştəri üzrə aparılan satışlar və topdansatış təchizatçılarında alışı qeyd etsələr də, digər fərdi müştəri və təchizatçılar üzrə məlumatlar yoxdur;
• şirniyyatı evə aparır və ondan dostlar ilə birgə istifadə edirdilər; beləliklə, onların alışına xərc çəkilir, gəlir isə yox idi. Onlar ailə biznesinə fərdi müəssisə kimi yanaşmır və uyğun qeydlər etmirdilər.

Nəticədə, problemlərlə üzləşiblər və təcili qərar qəbul etməlidirlər. Təcili qərar qəbul etmək üçün müəyyən məlumatlar lazımdır. Fəaliyyətləri barədə məlumat çatışmazlığından yaranan hazırkı vəziyyətdə təcili qərar qəbul etmək çətindir, bu isə müəyyən itkilər deməkdir. Belə ki, onlar müəssisəni sataraq qazanc əldə etmək, yaxud biznesi daha da inkişaf etdirərək əldə saxlama imkanından məhrum ola bilərlər.

Mühasibat uçotu məlumatları hansı mənbələrdən formalaşır?

Mühasibat müxtəlif təsərrüfat əməliyyatlarının fasiləsiz uçotu vasitəsilə müəssisənin əmlakı, öhdəlikləri, habelə onların hərəkəti haqqında məlumatların toplanması, təsbiti və sistemləşdirilməsi sistemidir.

Mühasibat uçotunun aparılması  prosesində müvafiq təsərrüfat əməliyyatlarını, habelə onların nəticələrini əks etdirən sənədlər toplusu formalaşır.

Sənədləri formalaşma mənbələrinə görə 2 qrupa ayırmaq mümkündür:

• mühasibat uçotu məlumatlarının mənbələri;
• maliyyə hesabatlarına aid edilən sənədlər.

Birinci qrupa aşağıdakılar aiddir:

• ilkin sənədlər;
• uçot registrləri.

İlkin sənədlər müəssisənin təsərrüfat fəaliyyətində baş verən bütün faktları (məsələn, malların tədarükü, satışı, xidmətlərin göstərilməsi, alışı) özündə əks etdirir. İlkin sənədlərin çeşidi genişdir, tətbiqi normativ aktlarla tənzimlənir.

Uçot registrləri ilkin sənədlərinin məlumatlarını sistemli şəkildə təsvir etdirən mənbələrdir. Müəssisələrin mühasibat uçotunda registrlər də ən geniş diapazonda təmsil oluna bilər. Memorial order forması əsasında sintetik uçot aparan müəssisələrdə registrlərin tərkibi Maliyyə Nazirliyinin “Maliyyə Hesabatlarının Beynəlxalq Standartlarına, Kiçik və Orta Sahibkarlıq Subyektləri üçün Maliyyə Hesabatlarının Beynəlxalq Standartlarına və İctimai Sektor üçün Mühasibat Uçotunun Beynəlxalq Standartlarına uyğun olaraq memorial order forması əsasında sintetik uçotun aparılması Qaydası”  ilə tənzimlənir.

Mühasibat hesabatları toplusu aşağıdakı sənədlər əsasında formalaşır:

• təşkilatın balans hesabatı;
• maliyyə nəticələri, kapitalda dəyişikliklər, pul vəsaitlərinin hərəkəti və s. haqqında hesabatlar.

Mühasibat uçotu məlumatları hansı məqsədlə toplanır?

Mühasibat uçotu məlumatları maraqlı şəxsləri müəssisənin fəaliyyəti haqqında dolğun və etibarlı məlumatlarla təmin edir. Həmçinin məlumatlar müəssisələrə:

• Azərbaycan Respublikası qanunvericiliyinə riayət olunmasına;
• əmlakın, öhdəliklərin mövcudluğuna, hərəkətinə;
• resurslardan səmərəli istifadəyə nəzarət imkanı yaradır.

Müvafiq məlumatlar istifadəçilərə mənfi tendensiyaların qarşısını almağa, maliyyə sabitliyinin daxili ehtiyatlarını aşkar etməyə kömək edə bilər.

Müəssisənin ətraf mühiti məlumat istifadəçilərinin tərkibinə, onların məqsədlərinə birbaşa təsir edir.

Maliyyə uçotu məlumatlarının istifadəçiləri, bir qayda olaraq, 2 qrupa bölünür:

• daxili;
• xarici (kənar).

Mühasibat uçotu məlumatlarının daxili istifadəçilərinə şirkətin inzibati heyətini, şöbə müdirləri, menecerləri, işçiləri və s. aid etmək olar.

Mühasibat uçotu məlumatlarına kənar istifadəçilərin marağının məqsədi müəssisənin maliyyə vəziyyətini qiymətləndirmək, təhlil etməkdir. Şirkətin mühasibat sənədlərinin kənar istifadəçilərinin təhlilinə əsaslanan nəticələr, maraqlı tərəflərin böyük bir auditoriyası üçün qərar qəbulu prosesində əhəmiyyətli ola bilər.

Eyni zamanda, həm daxili, həm də xarici istifadəçilər arasında:

• birbaşa maliyyə marağı olan;
• dolayı maliyyə marağı olan;
• maliyyə marağı olmayan istifadəçilər fərqlənir.

Təsisçilər, iştirakçılar, kreditorlar və investorlar birbaşa maliyyə marağı olan, vergi orqanları, digər kontragentlər dolayı marağı olan, statistika orqanları yaxud qiymətləndiricilər maliyyə marağı olmayan istifadəçilərdir.

Uçot məlumatlarının dəyər meyarları hansılardır?

Mühasibat uçotu məlumatlarının dəyəri onun qərarların qəbuluna təsir imkanlarına görə qiymətləndirilə bilər. Məlumatlar aşağıdakı qiymət meyarlarına cavab verməlidir:

• operativlik – məlumatın qəbulu vaxtında baş verməlidir, əks halda öz aktuallığını itirir, müəssisənin real vəziyyətinə uyğun gəlmir;
• proqnozlaşdırılan – məlumat müəssisənin inkişaf tendensiyalarını izah edir, gələcək fəaliyyətin proqnozlaşdırılması üçün əsas rolunu oynayır;
• məlumat mənbəyi ilə əks-əlaqə – amil operativ idarəetmə qərarlarının həyata keçirilməsin təmin edir;
• etibarlılıq – istifadəçilərə tam, obyektiv, doğru məlumat lazımdır. Fəaliyyət faktlarını yoxlamağa və təsdiq etməyə imkan verən şəffaf məlumatlar etibarlı hesab olunur.

Maliyyə hesabatlarında açıqlanan məlumatların şərh edilməsi asan olmalıdır. Aşağıdakı cədvəldə istifadəçi qruplarına maraqlı məlumatlara nümunələr verilib.

Mühasibat uçotu məlumatları maliyyə marağı olan şəxslərə tələb olunduqda təqdim edilir. Sorğu edilən məlumatlar dövlət orqanlarının müəyyən etdiyi yaxud sorğu edən qurumların (məsələn, kredit təşkilatı, sığorta müəssisəsi) blank formasında hazırlanır. Kreditlər, subsidiyalar yaxud qrantlar almaq imkanı verilən məlumatın tamlığı və etibarlılığından asılıdır.

Əmək iqtisadiyyatı müəssisənin həm istehsal, həm də sosial alt sistemlərini ifadə edir, eyni zamanda, onun iqtisadi alt sisteminin mühüm elementidir.

Əmək iqtisadiyyatı bu ardıcıllıqlarla müəyyən olunur:

• Əmək resursları və müəssisə personalı. Əmək prosesi;
• İş vaxtı və əmək məhsuldarlığı;
• Müəssisədə əməyin normalaşdırılması;
• Əməkhaqqı təşkilinin prinsipləri;
• Əməkhaqqı formaları.

Əmək resursları və müəssisə personalı. Əmək prosesi

İstehsal prosesini həyata keçirmək üçün müəssisəyə lazım olan iqtisadi resursların bütün növlərindən əmək ehtiyatlarının xüsusi yer tutduğunu biz artıq bilirik. Çünki maddi nemətlərin istehsalının, şəxsi və milli sərvətin artmasının əsasını məhz insanların əmək fəaliyyəti təşkil edir.

Bir sıra mühüm anlayışları izah edək.

Əmək ehtiyatları

Əhalinin ictimai faydalı əmək fəaliyyəti ilə məşğul olmaq üçün fiziki inkişafa, əqli qabiliyyətə və biliyə malik olan əmək qabiliyyətli bir hissəsidir.

Əmək resurslarının həcmi əhalinin sayından, onun təkrar istehsalı rejimindən, artan yaş tərkibindən asılıdır. Ölkənin əmək resurslarının əsas hissəsini əmək qabiliyyətli yaşda olan əhali, həmçinin yeniyetmələr və əmək qabiliyyətli pensiya yaşı olan şəxslər təşkil edir.

Əmək fəaliyyətinin həyata keçirilməsi prosesində insan müəyyən fiziki və mənəvi enerji sərf edir, bu zaman əmək potensial qabiliyyətindən – işçi qüvvəsindən istifadə edir.

İşçi qüvvəsi

İnsanın malik olduğu və hər dəfə əmək fəaliyyəti prosesində istifadə etdiyi fiziki və mənəvi qabiliyyətlərin məcmusudur. “Əmək iqtisadiyyatı” mövzusunun kontekstində əmək bazarında satın alınan (satılan) işçi qüvvəsinin olduğunu qeyd etmək vacibdir. Bu zaman qeyd etmək lazımdır ki, satıcı (işçi) üçün sövdələşmə şərtləri nə qədər sərfəli olarsa, o qədər də öz qabiliyyətlərindən tam və keyfiyyətlə istifadə edəcək, əmək prosesi bir o qədər səmərəli gedə bilər. Beləliklə, işçi qüvvəsinin dəyərinin adekvat qiymətləndirilməsi istehsal prosesinin səmərəli təşkilinin ən mühüm elementidir.

İstehsalatın maddi və maliyyə amillərindən səmərəli istifadə etmək üçün nəzərdə tutulmuş əmək resursları müəssisədə onun işçiləri tərəfindən təqdim olunur.

Eyni zamanda, iki anlayışdan geniş istifadə olunur: müəssisənin kadr və personalı.

Müəssisənin kadrları dedikdə, müəssisədə ştat cədvəlinə uyğun olaraq işləyən müxtəlif peşə-ixtisas qruplarının muzdlu işçilərinin məcmusu başa düşülür. Müəssisənin kadrları, bir qayda olaraq, işçilərin əsas (ştat, daimi) tərkibidir.

Bir çox iqtisadçıların fikrincə, işçi heyəti anlayışı daha tutumlu olmaqla müəssisədə çalışan bütün şəxsi heyəti əhatə edir. Bura daxildir:

• əsas heyətin (ştat) işçiləri;
• digər müəssislərdən əvəzçilik üzrə işə qəbul edilən şəxslər;
• mülki-hüquqi xarakterli birdəfəlik müqavilə (öhdəlik müqaviləsi, xidmət göstərilməsi ilə əlaqəli müqavilə və s.) üzrə işləri yetirən şəxs.

Müəssisənin işçi heyəti kəmiyyət və keyfiyyət göstəricilərinə bölünən bir sıra xüsusiyyətlərə malik olmalıdır. Personalın keyfiyyət xüsusiyyətlərini xüsusi qeyd edək:

• müəyyən fəaliyyət sahəsində konkret biliklərin və peşəkar bacarıqlarının mövcudluğu;
• müəyyən peşəkar və şəxsi maraqlar (karyera qurmaq arzusu, peşəkar və şəxsi özünü reallaşdırmağa ehtiyac);
• konkret peşə fəaliyyəti üçün zəruri olan müəyyən psixoloji, intellektual, fiziki keyfiyyətlərin olması.

İşçi heyəti kateqoriyalar üzrə fərqləndirilir (rəhbərlər, mütəxəssislər, işçilər): peşələr üzrə; ixtisaslar və ixtisas əlamətləri üzrə.

Rəhbərlər – bunlar müəssisədə rəhbər (direktor, usta, baş mütəxəssis və s.) vəzifələrini tutan işçilərdir.

Mütəxəssislər – bunlar ali və ya orta ixtisas təhsili olan işçilərdir, habelə xüsusi təhsili olmayan, lakin müəyyən vəzifə tutan işçilərdir.

Texniki işçilər – sənədlərin hazırlanması və rəsmiləşdirilməsini, uçot və nəzarəti, təsərrüfat xidmətini (agentlər, kassirlər, kargüzar, katiblər, statistika və s.) həyata keçirən işçilərdir.

Ümumi sayında işçilərin müxtəlif kateqoriyalarının nisbəti müəssisənin, sexin, sahənin kadr (personalının) strukturunu səciyyələndirir. Kadrların strukturu həmçinin yaş, cins, təhsil səviyyəsi, iş stajı, ixtisaslaşma, normaların yerinə yetirilməsi dərəcəsi və s. kimi əlamətlərə görə müəyyən edilə bilər.

Personalın peşəkar – ixtisas strukturu əməyin peşəkar və ixtisas bölgüsü əsasında formalaşır. Peşə altında adətən müəyyən hazırlıq tələb edən əmək fəaliyyətinin növünü (cinsini) başa düşürlər. İxtisas bu peşəyə işçilərin mənimsənilməsi tədbirini xarakterizə edir və ixtisas (tarif) dərəcələrində, kateqoriyalarda əks olunur. Tarif dərəcələri və kateqoriyalar da işin çətinlik səviyyəsini xarakterizə edən göstəricilərdir.

Müəssisənin ətraf mühiti nədir?

Müəssisə boşluqda fəaliyyət göstərmir, cari, strateji fəaliyyətində müxtəlif amillərin məcmusundan ibarət mühitlə əhatələnib. Dünyada hər şey, o cümlədən, müəssisəni əhatə edən mühit daima dəyişir.

İndiki dövr əmtəə və avadanlıqların sürətlə köhnəlməsinə səbəb olan texnoloji yeniliklər, rəqiblərin qüvvələrində köklü dəyişikliklər dövrüdür. Bütün bunlar müəssisəni dəyişən ətraf mühit şəraitinə uyğunlaşmağa məcbur edir. Təsirlərin proqnozlaşdırılmasında mühasibat uçotu məlumatlarının rolu əvəzsizdir.

Müəssisəni əhatə edən mühit 2 qrupa bölünür:

• makro mühit;
• mikro mühit.

Makro mühit müəssisənin maraqları ilə ziddiyyətdə olan, mikro mühitə təsir göstərən, təşkilatdan asılı olmayan əsas təsir qüvvələridir. Sosial-demoqrafik, iqtisadi, elmi-texniki, siyasi mühit, mədəni, həmçinin təhsil kimi faktorlar onu xarakterizə edən faktorlardandır.

Məsələn, müəyyən dövrdə ailələrin sayı azalıb, işləyən qadınların sayı artıb. Evdar qadınlar üçün tikiş maşınları istehsalçısı olan şirkət sosial – demoqrafik faktorun təsirini nəzərə almalıdır, əks halda tənəzzülə uğraya bilər.

 Mikro mühitin əsas faktorları

Şirkətin əsas məqsədi mümkün qədər çox mənfəət əldə etməkdir. Buna bazarda cəlbedici əmtəə və xidmətlər istehsalı etməklə nail olmaq olar. İdarəetmə sisteminin hədəfə istiqamətlənmiş təsərrüfat fəaliyyəti:

• müştərilərin;
• vasitəçilərin;
• rəqiblərin;
• şirkət işçilərinin hərəkətlərindən asılıdır.

Bunlar müəssisənin mikro mühitini formalaşdırır.

Mikro mühitin təsnifatı

Mikro mühit hər birinin müəssisənin fəaliyyətində rolu yaxud marağı olan iki qrupa bölünür:

• daxili;
• xarici.

Müəssisənin daxili mikro mühitinə aşağıdakı şöbə, xidmət, bölmələr aid edilir:

• rəhbərlik;
• maliyyə xidməti;
• istehsal prosesi;
• maddi-texniki təchizat;
• mühasibat xidməti.

“Xarici” sözü xarici ölkələr anlamında deyil, kənar təsirlər (şəxslər) mənasında işlənir. Xarici mikro mühit – şirkətlə qarşılıqlı əlaqəli, şirkət tərəfindən hər hansı şəkildə (məsələn, müqavilə) idarə olunan bütün strukturların məcmusudur. Bunlara:

• təchizatçıları;
• vasitəçiləri;
• müştəriləri
• rəqibləri nümunə göstərmək olar.

Xarici mikro mühiti formalaşdıran amillərin vaxtında, dəqiqi mühasibat uçotu müəssisə rəhbərliyinə mənfi təsirləri proqnozlaşdırmağa, mənfi təsirləri vaxtında aradan qaldırmağa imkan yaradır.

Mühasibat uçotu və müəssisənin ətraf mühiti

Son 50 ildə dünya əhəmiyyətli dərəcədə dəyişib. Buna bir çox hadisələr, məsələn texnoloji tərəqqi, qloballaşma səbəb olub.

Müəssisəni əhatə edən biznes mühitinin sürətlə dəyişməsi, qeyri-sabit, qeyri-müəyyən olması rəqabət qaydalarına əsaslı təsir edib. Biznes mühit dəyişdikcə, mühasibat uçotu ətraf mühitdə və texnologiyada baş verən dəyişikliyə uyğunlaşmaq məqsədilə inkişaf etməli, biznes məlumatlarının qeydiyyatının, təhlilinin, təqdimatının səmərəli üsullarını tapmalı, daim inkişaf etməlidir.

Sadə bir nümunəyə baxaq. Biz uçotun tarixindən danışarkən, müasir mühasibat uçotunun müəssisənin ətraf mühitinin dəyişən faktorlarının təsiri altında necə inkişaf etdiyini izləmişdik. Yaxud beynəlxalq mühasibat cəmiyyətlərinin formalaşması məhz müəssisələrin daima inkişafda olan əhatə mühitinin təsiri altında baş verirdi.

Mühasibata təsir edən ətraf mühit amilləri

Qloballaşma, xarici iqtisadi əlaqələr, korporasiyalar mühasibat uçotunun beynəlxalq mühasibat uçotu standartlarının hazırlanmasını zəruri edir.

Artan bazarlar, rəqabət idarəetmə uçotu mühasiblərindən imkanlar yaxud təhlükələrə cəld, çevik reaksiya tələb edir. Onlar beynəlxalq bazarlar, mədəni mühitlər barədə biliklərə yiyələnməli, müəyyən ölkələrə xas risklərdən xəbərdar olmalıdırlar.

Xammalın qiyməti, biznesin aparılması xərcləri artdıqca, rəqabətə davamlı məhsulların istehsalı xərclərin idarə edilməsi vacibdir.

Daxili əməliyyatlar üzərində şəffaflığın, nəzarətin artırılması əhəmiyyətlidir. İdarəetmə uçotu baxımından mühasiblər bütün funksiyalar üzrə menecerlərlə müntəzəm əlaqə saxlamalıdırlar.

Bazarlar əhəmiyyətli gəlir üçün unikal fürsət təqdim edərkən, bəzi şirkətlər özlərini vergidən yayınma, fırıldaqçılıq, rüşvətxorluq, korrupsiya risklərinə məruz qoyurlar.

Nəticədə:

• Mühasibat uçotu mütəxəssisləri rəqəmlərin sadəcə hesablanmasını deyil, kommersiya əsasını anlayaraq, müəssisəni əhatə edən mənfi amillərin biznes mühitə təsirini yuxarıdan aşağı, idarəetmənin hər mərhələsində məlumatlandırmaqla, etik və hesabatlılıq məsələlərində mühüm rol oynamalıdır.
• Ümumiyyətlə, mühasibat uçotu müəssisənin ətraf mühiti amillərinin idarə edilməsində aktiv iştirak etməklə, onun öz missiyasına nail olmasına öz töhfəsini verməlidir.

Hazırda mühasibatın fəaliyyəti mənfəətə diqqət yetirməkdən daha çox, müştərilər, işçilər,  cəmiyyət kimi müxtəlif maraqlı tərəflərlə işgüzar münasibətlərə yönəlməkdədir.