Riskli vergi ödəyiciləri siyahısından necə çıxmalı?
Riskli vergi ödəyiciləri siyahısına düşmək istənilən sahibkar üçün arzuedilməzdir. Bəs bu siyahıdan çıxmaq üçün nə etməli? Mövzunu maliyyə mütəxəssisi Vüqar Mirheydərov şərh edir.
“Onlayn Kargüzarlıq”da poçt qutusunu açıb, orada riskli vergi ödəyicilərinin siyahısına daxil olma barədə bildiriş gördükdə hansı hərəkətlərin edilməli olduğunu nəzərdən keçirək. Əksər hallarda bu, obyektiv səbəbdən baş verir. Yəni siyahılara daxil edilən şəxs özü də çox gözəl bilir ki, bu iş hansı əməliyyata, hərəkətə və ya hərəkətsizliyə görə baş verib. Ona görə də əvvəlcə bu məsələni araşdırmaq lazımdır: hansı meyar üzrə və hansı əməliyyat səbəbindən riskli vergi ödəyicisi sayılmısınız?
Qeyd etmək lazımdır ki, bu səbəb riskli vergi ödəyicisi siyahısına daxil olduğunuz barədə məktubda qeyd edilməlidir.
Hadisə barədə şirkət rəhbərliyinə məlumat verin: şirkət rəhbərliyinin baş verənləri Dövlət Vergi Xidmətindən və ya müqavilə tərəfdaşlarından yox, sizdən eşitməsi daha məqbuldur.
Sonuncu dəfə elektron hesab-fakturalarını verdiyiniz hər kəsə zəng edin və onlara məsələni təfərrüatı ilə izah edin. Onsuz da onlar qaimə-fakturanı təsdiqləməyə çalışdıqda, riskli vergi ödəyicisi olduğunuz barədə sistem xəbərdarlığı görəcəklər, bu barədə əvvəlcədən danışmaq daha məqsədəuyğundur.
Bu siyahıdan çıxmaq üçün ilk addım bu siyahılara daxil olmağın səbəbini aradan qaldırmaqdır. Siyahıya düşmə səbəbi Dövlət Vergi Xidməti tərəfindən qeydiyyata alınmış anbarın olmamasıdırsa, dərhal qeydiyyat prosesinə başlayın. Göndərilmiş elektron hesab-fakturada səhv məhsul və ya xidmət kodunu daxil etməmisinizsə, onu düzəldin. Bir sözlə, problemi aradan qaldırın.e
Əgər siz vergi xidmətinin səhv etdiyini və sizin riskli vergi ödəyiciləri siyahısına salınmağınızın əsassız olduğunu hesab edirsinizsə, öz arqumentlərinizi onlara açıqlayıb, mövqeyinizi sübut etməyə cəhd edə bilərsiniz. Öz mövqeyinizi əsaslandırsanız, riskli vergi ödəyicisi siyahısından çıxarılacaqsınız.
Nəhayət, riskli vergi ödəyiciləri siyahısından çıxarılmaq barədə qərarı İqtisadiyyat Nazirliyi verdiyi üçün nazirliyə bu barədə müraciət etməlisiniz. Bir daha xatırlatmaq istəyirəm: ilk növbədə bu siyahılara daxil olmağın səbəbini aradan qaldırmalı və müraciətinizdə bunu qeyd etməlisiniz.
Siyahıdan çıxarılma proseduru uzana bilər. Riskli vergi ödəyicilərinin siyahısına daxil edildiyiniz andan vergi orqanlarının ciddi nəzarəti altında olduğunuzu unutmayın. Yadda saxlayın ki, riskli vergi ödəyicilərinə növbədənkənar səyyar vergi yoxlaması və ya operativ vergi nəzarəti tədbirləri tətbiq edilə bilər.
Mənbə: vergiler.az
Bax:
Vergi ödəyicisinin əsas vəzifələrindən biri əhali ilə pul hesablaşmaları aparan zaman müştəridən əldə etdiyi pul vəsaitlərinə görə müştəriyə çek, qəbz, bank çıxarışları və digər ciddi hesabat blanklarını təqdim etməkdir. Əks halda vergi ödəyicilərini hansı məsuliyyət tədbirləri gözləyir? Mövzunu vergi eksperti Anar Bayramov şərh edir.
Qazaxıstan respublikasının mühasibləri oktyabrın 6-da öz peşə bayramlarını qeyd edirlər. Qazaxıstanda Mühasib Günü hələ ki, rəsmi statusa malik olmasa da, heç bir təşkilatın keçinə bilmədiyi peşəkarlar onu geniş şəkildə qeyd edirlər.
Kapital Bank-ın mütəmadi olaraq şirkətlər, hüquqi şəxslər və fərdi sahibkarlar üçün müxtəlif yeniliklər və məhsullar təqdim edir. Bu dəfə olan yeni xidmət qeyri-rezident sahibkarlar və şirkətlər üçün nəzərdə tutulub. Belə ki, onlar Müştəri Bank vasitəsilə banka gəlmədən, vaxta qənaət etməklə hesablarını onlayn aça biləcəklər.