Blog Full

Mövzunu vergi eksperti İsmayıl Bağırov şərh edir.

Vergi Məcəlləsinin 199.1-ci maddəsinə əsasən, aşağıdakı hüquqi şəxslər əmlak vergisini ödəməkdən azaddır:

• Dövlət hakimiyyəti orqanları;
• Büdcə təşkilatları;
• Yerli özünüidarəetmə orqanları;
• Azərbaycan Respublikasının Mərkəzi Bankı və onun qurumları;
• Dövlətin adından yaradılan publik hüquqi şəxslər (sahibkarlıq fəaliyyəti məqsədləri üçün istifadə olunan əmlaka görə ödənilməli vergi istisna olmaqla);
• Dövlət fondları;
• Əlilliyi olan şəxslərin qeyri-hökumət təşkilatları.

Vergi Məcələsinin 199.2-ci maddəsində göstərilib ki, misgərlik, qalayçılıq, dulusçuluq və saxsı məmulatlarının, təsərrüfat müxəlləfatının, bağçılıq-bostançılıq alətlərinin, xalq musiqi alətlərinin, oyuncaqların, suvenirlərin, qamışdan və qarğıdan məişət əşyalarının düzəldilməsi, keramika məmulatlarının bədii işlənməsi, bədii tikmə, ağac materiallardan məişət alətlərinin hazırlanması sahəsində hüquqi şəxs yaratmadan sahibkarlıq fəaliyyəti ilə məşğul olan fiziki şəxslərin sənətkarlıq emalatxanalarının binaları və ya binaların bu emalatxanalar yerləşən hissələri əmlak vergisinə cəlb edilmir.

Misal 1

Sahibkarlıq fəaliyyəti ilə məşğul olan fiziki şəxs emalatxanasında misgərlik fəaliyyəti ilə məşğul olur. Bu maddəyə əsasən həmin emalatxana əmlak vergisinə cəlb edilmir.

Qeyd edək ki, göstərilən fəaliyyət növü ilə hüquqi şəxs məşğul olsaydı, emalatxana əmlak vergisinə cəlb olunacaqdı.

Vergi Məcəlləsinin 199.3-cü maddəsinə əsasən, binaların icarəyə, kirayəyə verildiyi, habelə sahibkarlıq və ya kommersiya fəaliyyəti ilə məşğul olmaq üçün istifadə edildiyi hallar istisna olmaqla, Vergi Məcəlləsinin 102.1-1-ci və 102.2-ci maddələrində göstərilən şəxslərin, habelə pensiyaçıların və müddətli hərbi xidmət hərbi qulluqçularının və onların ailə üzvlərinin müddətli hərbi xidmət dövründə binalara görə ödəməli olduqları əmlak vergisinin məbləği 30 manat azaldılır.

Bu maddəyə əsasən, pensiyaçıların və müddətli hərbi xidmət hərbi qulluqçularının və onların ailə üzvlərinin, habelə aşağıdakı fiziki şəxslərin (Vergi Məcəlləsi 102.1-1-ci və 102.2-ci) mülkiyyətində olan binalara görə ödəməli olduqları əmlak vergisininin məbləği 30 manata qədər azaldılır.

• Şəhid statusu almış şəxslərin valideynlərinin, dul arvadlarının (ərlərinin) və övladlarının;
• Azərbaycan Respublikasının Vətən Müharibəsi Qəhrəmanlarının;
• Azərbaycan Respublikasının Milli Qəhrəmanlarının;
• Sovet İttifaqı və Sosialist Əməyi Qəhrəmanlarının;
• müharibə ilə əlaqədar əlilliyi olan şəxslərin;
• həlak olmuş, yaxud sonralar vəfat etmiş döyüşçülərin dul arvadlarının (ərlərinin) və övladlarının;
• 1941-1945-ci illərdə arxa cəbhədə fədakar əməyinə görə orden və medallar ilə təltif edilmiş şəxslərin;
• qanunvericiliklə müəyyən edilmiş qaydada müharibə veteranı adı almış şəxslərin;
• Çernobıl AES-də qəza, mülki və ya hərbi təyinatlı atom obyektlərində digər radiasiya qəzaları nəticəsində, habelə nüvə qurğularının hər hansı növləri, o cümlədən nüvə silahı və kosmik texnika ilə bağlı olan sınaqlar, təlimlər və başqa işlər nəticəsində şüa xəstəliyinə və şüa yükü ilə əlaqədar xəstəliyə tutulmuş və ya bu xəstəlikləri keçirmiş şəxslərin.

Müddətli hərbi xidmət hərbi qulluqçuları dedikdə kimlərin nəzərdə tutulduğunu “Hərbi vəzifə və hərbi xidmət haqqında” Azərbaycan Respublikasının Qanununa əsaslanaraq müəyyən etmək olar. Həmin qanunun 28.2-ci maddəsinə əsasən, müddətli həqiqi hərbi xidmət keçən hərbi qulluqçulara Qanunla müəyyən edilmiş müddətlər daxilində həqiqi hərbi xidmət keçən əsgərlər, matroslar və çavuşlar aiddirlər.

Pensiyaçılar dedikdə isə kimlərin nəzərdə tutulduğunu “Əmək pensiyaları haqqında” Azərbaycan Respublikasının Qanununa əsaslanaraq müəyyən etmək olar. Bu qanunun 4-cü maddəsinə əsasən, əmək pensiyaları yaşa görə, əlilliyə görə və ailə başçısını itirməyə görə pensiyalara bölünür. Vergi Məcəlləsinin 199.3-cü maddəsində pensiyaçılar dedikdə heç bir istisna nəzərdə tutulmadığından, 30 manat güzəşt hüququ əmək pensiyalarının bütün növlərinə şamil edilir.

Misal 2

Naxçıvan şəhərində yaşayan və oğlu orduda əsgər olan fiziki şəxsin xüsusi mülkiyyətində 230 kvadratmetr sahəsi olan mənzili vardır. Əmlak vergisinin məbləğini hesablayaq.

Vergi Məcəlləsinin 198.1.1-ci maddəsinə əsasən, yaşayış sahələrinin 30 kvadratmetrindən vergi hesablanmadığı üçün fiziki şəxsin xüsusi mülkiyyətində olan mənzilin 30 kvadratmetrindən vergi tutulmur, 30 kvadratmetrdən çox olan hissəsindən isə hər kvadratmetrinə görə 0,2 manat vergi hesablanır. Belə olan halda əmlak vergisinin məbləği 40 manat olacaq:

230 – 30 = 200 kvadratmetr;
200 x 0,2 = 40 manat.

Fiziki şəxsin övladı müddətli hərbi xidmət hərbi qulluqçusu olduğuna görə ödəməli olduğu əmlak vergisininin məbləği 30 manat azaldılır. Bu halda fiziki şəxs 10 manat əmlak vergisi ödəyəcək:

40 – 30 = 10 manat.

Misal 3

Kəngərli rayon Qıvraq qəsəbəsində yaşayan pensiyaçının xüsusi mülkiyyətində 180 kvadratmetr sahəsi olan mənzili kirayəyə verib. Əmlak vergisinin məbləğini hesablayaq:

Vergi Məcəlləsinin 198.1.1-ci maddəsinə əsasən, yaşayış sahələrinin 30 kvadratmetrindən vergi hesablanmadığı üçün pensiyaçının xüsusi mülkiyyətində olan mənzilin 30 kvadratmetrindən vergi tutulmur. Ondan çox olan hissəsindən isə hər kvadratmetrinə 0,1 manat vergi hesablanır. Belə olan halda əmlak vergisinin məbləği 15 manat olacaq:

180 – 30 = 150 kvadratmetr;
150 x 0,1 = 15 manat.

Baxmayaraq ki, fiziki şəxs pensiyaçıdır mənzilini kirayəyə verdiyi üçün ona əmlak vergisində 30 manat güzəşt tətbiq olunmayacaq. Deməli, pensiyaçı 15 manat əmlak vergisini ödəyəcək.

Qeyd edək ki, güzəşt hüququ olan fiziki şəxsin bir neçə bələdiyyənin ərazisində binaları olduqda, 30 manat məbləğində güzəşt fiziki şəxsin seçiminə uyğun olaraq bir bələdiyyə ərazisində hesablanmış əmlak vergisi məbləğindən çıxılır.

Misal 4

Müharibə veteranı fiziki şəxsin Bakı şəhərinin Azadlıq prospektində (3-cü zona) yerləşən çoxmənzilli binada sahəsi 120 kvadratmetr olan və Naxçıvan şəhərində sahəsi 70 kvadratmetr olan mənzili vardır. Fiziki şəxsin əmlak vergisini hesablayaq:

Vergi Məcəlləsinin 198.1.1-ci maddəsinə əsasən, yaşayış sahələrinin 30 kvadratmetrdən vergi hesablanmadığı üçün müharibə veteranının xüsusi mülkiyyətində olan mənzillərin hər birinin 30 kvadratmetrdən vergi tutulmur. Bundan çox olan hissəsindən Naxçıvan şəhəri üçün hər kvadrat metrinə görə 0,2 manat, Bakı şəhəri üçün hər kvadratmetrinə görə 0,4 manat vergi hesablanır. Nazirlər Kabinetinin Qərarında 3-cü zonanın əmsalı 1,3 müəyyən olunduğundan Bakı şəhəri üçün hesablanan vergi 1,3 əmsala vurulur.

Belə olan halda Bakı şəhəri üçün əmlak vergisinin məbləği 46,8 manat ((120 – 30) x 0,4 x 1,3 = 46,8 manat ) , Naxçıvan şəhəri üçün əmlak vergisinin məbləği isə 8 manat ((70 – 30) x 0,2 = 8 manat) olacaq. Fiziki şəxs müharibə veteranı olduğu üçün cəmi ödəməli olduğu əmlak vergisininin məbləği 30 manat azaldılır. Bu halda fiziki şəxs 24.8 manat əmlak vergisi ödəyəcək:

(46.8 manat + 8 manat) – 30 manat = 24.8 manat

Onu da qeyd edək ki, güzəşt hüququ olan fiziki şəxsin bir neçə mənzili olduqda, 30 manat məbləğində güzəşt hər mənzilə ayrılıqda verilmir, cəmi ödəməli olduğu əmlak vergisi məbləği 30 manat azaldılır.

Mənbə: vergiler.az

İcbari ödənişlər

Mühasib olaraq ən çox rastlaşdığımız məsələlərdən biri işçilərin əməkhaqqından tutulmalardır. İcbari ödənişlər istisna olmaqla əməkhaqqından yalnız işçinin yazılı razılığı ilə, yaxud qanunvericiliklə nəzərdə tutulan icra sənədlərinə əsasən tutulmalar edilə  bilər (Əmək Məcəlləsi, maddə 175).

Məcəllənin 175.2-ci maddəsinə görə icbari ödənişlərə vergilər, sosial sığorta haqları və digər icbari ödəmələr aid edilir. Sosial sığorta haqlarına nümunə kimi bunları göstərmək olar:

• məcburi dövlət sosial sığorta haqqı;
• icbari tibbi sığorta ödənişləri;
• ışsizlikdən sığorta.

İcbari ödənişlərin tutulma qaydaları uyğun qanunvericilik aktları ilə tənzimlənir. Əməkhaqqından tutulmalar üzrə mühasibat uçotu üçün Hesablar Planında bir sıra hesablar nəzərdə tutulub. “Qısamüddətli öhdəliklər” bölməsinin 52-ci maddəsi vergi və sair məcburi ödənişlər üzrə uçotun aparılmasın tənzimləyir. İcbari ödənişlərə görə öhdəliklər işçilərə əməkhaqqı hesablanması, habelə sosial müavinətlər təyin edilərkən yaranır.

Qanunvericilik

Mühasib olaraq siz, öz işinizdə, mühasibat uçotu haqqında mövcud qanunvericilik, mühasibat uçotu və maliyyə hesabatları ilə bağlı beynəlxalq standartlardan istifadə edirsiniz. Amma mühasibat uçotunun aparılması üçün bunlar kifayət deyil. Paralel olaraq digər qanunvericilik aktları ilə də tanış olmalısınız, əks təqdirdə müəyyən maliyyə itkiləri ilə rastlaşa bilərsiniz.

İşçilərin əməkhaqqından tutulmalar üzrə tənzimləyici sənədlər belə qanunvericilik aktlarındandır.

Məsələn, mövcud qanunvericiliyə əsasən işçilərin əməkhaqqından tutulmalar maaş hesablaşmaları ilə eyni vaxtda aparılmalıdır. Qanunvericilik tutulmaların büdcəyə ödənilməsini ən geci növbəti ayın 15-inə kimi icra edilməsin tələb edir.

Qanunvericiliyin müddəalarını bilməmək əlavə faizlər, penyalar, həmçinin bir sıra hallarda maliyyə sanksiyası və cərimələrə səbəb ola bilər. Mühasib bu işlər üçün məsul vəzifəli şəxs hesab edilir, eyni zamanda tam maddi məsuliyyətlə bağlı müqavilə əsasında tam məsuliyyət daşıyır.

Vergi ödənişləri üzrə ödəniş müddətləri AR Vergi Məcəlləsi ilə müəyyən edilib.

Əməkhaqqından tutulmalar üzrə uçot

Vergi öhdəlikləri hesablar planında 521 saylı “Vergi öhdəlikləri” adlı hesabda uçota alınır, belə ki, bu cür öhdəlik mahiyyətcə qısamüddətli öhdəlikdir. Mənfəət vergisinə görə mühasibat uçotu məqsədləri üçün xərcin uçotu 901-ci hesabda aparılır.

Ayrı-ayrı vergi növləri üzrə (ƏDV, mənfəət, əmlak və s.) uçotun aparılması üçün 521-ci hesaba subhesablar açmaq olar. Məsələn, işçilərin əməkhaqqından tutulmalar hesablanarkən vergilərin mühasibat uçotu üçün 521-2 “Vergi öhdəlikləri – gəlir vergisi” adlı subhesab açmaq olar.

İşçilərin əməkhaqqından tutulan, habelə əməkhaqqı fonduna görə işəgötürənin qanunla müəyyən edilmiş məcburi dövlət sosial sığorta haqları üzrə ödənişlərin uçotu 522 saylı “Sosial sığorta və təminat üzrə ödənişlər” adlı hesabda uçota alınır.

İşsizlikdən sığorta, icbari tibbi sığorta haqları, habelə əməkhaqqı fonduna görə qanunla müəyyən edilmiş işəgötürənin ödəməli olduğu icbari ödənişlərin (məsələn, həmkarlar təşkilatının üzvülük haqqı) mühasibat uçotu 523 saylı “Digər məcburi ödənişlər üzrə öhdəliklər” hesabında aparılır.

Digər məcburi tutulmalar

Məhkəmə qərarının məcburi icrası üçün işçinin əməkhaqqından tutulmalar həyata keçirilə bilər. Əməkdaşların gəlirlərinə yönəldilmiş məhkəmə qərarlarının təmin edilməsi üçün icra məmurlarının təqdim etdiyi qərarlar qanunvericiliyə uyğun yerinə yetirilməli, mövcud tələblə əməkdaşa məlumat verilməlidir.

Təcrübədə adətən belə hallar şirkət əməkdaşının digər təşkilatlara olan kredit borcları, yaxud ödəməli olduğu aliment səbəbindən qaynaqlanır. Bununla bağlı müəssisə mühasibatlığı icra sənədi ilə tanış edilməlidir. Diqqətinizə çatdıraq ki, icra ödənişlərinə görə tutulma şirkətdə işçiyə verilən əməkhaqqının (bunu bəzən net əməkhaqqı da adlandırırlar) 50%-indən çox olmamalıdır (ƏM, maddə 176).

Hesablama nümunəsi

Neft-qaz sektorunda fəaliyyəti olan sayılan “X” MMC-də çalışan şəxsin əmək müqaviləsi üzrə maaşı 850 manatdır. İcra şöbəsindən təşkilata banka olan kredit borcuna əsasən işçinin maaşından 50% tutularaq müvafiq rekvizitə ödənilməsi tələbi yönəldilib.

“X” MMC-nin mühasibatlıq şöbəsi hesablamanı aşağıdakı formada həyata keçirməlidir:

Gəlir vergisi:  (850-200)x14% =91 manat
MDSS (3%):    850×3% = 25,50 manat;

İşsizlikdən sığorta (0.5%) : 850 x0,5 = 4,25 azn;

İcbari tibbi sığorta (2%):  850 x 2% = 17 azn;

İşçiyə çatan net əməkhaqqı: 850 – 91 – 25.5 – 4.25 – 17 = 712.25 man;

İcra sənədi üzrə tutulmalı olan məbləğ: 712.25 x 50% = 356.13 man .

Sual yarana bilər ki, işçinin əməkhaqqından tutulma edərkən mühasibatlıq şöbəsi işçinin yazılı razılığını almalıdırmı?

Əmək qanunvericiliyidə işçilərin əməkhaqqından tutulmalar işçinin razılığı ilə və belə razılıq olmadan tutulma kimi iki yerə ayrılır. Məhkəmə qərarına əsasən yuxarıdakı nümunə üzrə qeyd etdiyimiz tutulmalar işçinin razılığı alınmadan, hətta müəssisə rəhbərinin qərarı olmadan edilə bilər.

Hüquqi öhdəliklər

Hüquqi öhdəlik (legal obligation) müqavilənin şərtlərindən və ya qanuni tələblərdən irəli gələn öhdəlikdir (bax: 37 №-li MUBS-un (IAS37) 10-cu bəndi). Bu standarta görə “öhdəlik keçmiş hadisələrdən yaranan, ödənməsi iqtisadi səmərələri təcəssüm etdirən resursların müəssisədən xaric olması ilə nəticələnəcəyi gözlənilən müəssisənin cari borcudur.” Müddətindən asılı olaraq borc öhdəlikləri qısamüddətli və uzunmüddətli olmaqla iki növə bölünür. Belə bölgü hüquqi öhdəliklərə də aiddir. 413 saylı “Uzunmüddətli hüquqi öhdəliklər” hesabı müəssisənin uzunmüddətli (12 aydan artıq) hüquqi öhdəliklərin uçotu üçün nəzərdə tutulub. Nümunə kimi, məhkəmə qərarlarından yaranan öhdəlikləri göstərmək olar.

413-cü hesab mühasibat uçotunun hesablar planının 41-ci “Uzunmüddətli qiymətləndirilmiş öhdəliklər” maddəsi üzrə açılan hesablardan biridir.

Uzunmüddətli qiymətləndirilmiş öhdəliklər

Qiymətləndirilmiş öhdəliklərə ödəniş vaxtı, dəyəri qeyri-müəyyən olan yaxud da ödənilmə ehtimalı aşağı olan öhdəliklər aid edilir. Qiymətləndirilmiş öhdəliklər ehtimaldan yaranır, əsasən hesabat dövrünü əhatə edir. Onlar aşağıdakı şərtlərlə xarakterizə olunur:

• mühasibat uçotu subyekti keçmiş hadisələr nəticəsində yaranan cari öhdəliyə sahib olmalıdır;
• öhdəliyin ödənilməsi üçün iqtisadi səmərələri təzahür etdirən mənbələrin xaric olunmasının tələb ediləcəyi ehtimal olunmalıdır;
• öhdəlik üzrə dəyəri etibarlı qiymətləndirilə bilməlidir.

Uzunmüddətli öhdəliklərə subhesabların açılması, müxabirləşmələrin verilməsi AR MN kollegiyasının Q-01 №-li “Maliyyə Hesabatlarının Beynəlxalq Standartlarına əsasən mühasibat uçotunun aparılması Qaydaları” vasitəsilə tənzimlənir.

Qaydaların 35.1-ci maddəsi aşağıdakı hesabları əhatə edir:

413 №li “Uzunmüddətli hüquqi öhdəliklər” hesabı

Öhdəlik yaradan hadisənin baş verməsinin səbəbi həm qanunla nəzərdə tutulduğu hallar, həm də təcrübədən irəli gələ bilər. Birinci halda öhdəlik hüquqi hesab olunur.

Beləliklə, müvafiq öhdəliyin əmələ gəlməsi ilə bağlı öhdəlik yaradan hadisə baş verməlidir. Amma bəzən nə obyektin alındığı zaman, nə də istismarı zamanı öhdəliklərin məbləğini dəqiq müəyyən etmək mümkün olmadığından, xərclər təxmin edilən kimi hesablanır və bu məbləğ əsasında illik diskontlaşdırma yolu ilə ehtiyat yaradılır. Ehtiyat məbləği obyekt (ehtiyat) tanındıqca onun dəyərinə əlavə edilir.

Məsələn, neft hasilatı üçün avadanlıq almaqla şirkət müəyyən ərazidə hasilat başa çatdıqdan sonra quyunu istismardan çıxarmağı, sökməyi, qalıqları utilizasiya etməyi və çirklənmiş ərazini təmizləməyi öhdəsinə götürür. Bu, obyektin əldə edilməsi ilə birlikdə hansı məbləğdə ehtiyat vəsaitin saxlanması ilə bağlı öhdəliklərin yaranmasına nümunədir. 37 №-li MUBS baxımından bu cür öhdəliklər hüquqi öhdəliklər adlanır.

413 №-li “Uzunmüddətli hüquqi öhdəliklər” hesabı öhdəlik (passiv) hesabıdır. Bu hesabda mühasibat uçotu subyektinin hesabat tarixindən sonra 12 ay ərzində yerinə yetirilməsi nəzərdə tutulmayan hüquqi öhdəlikləri barədə ümumiləşdirilmiş məlumatlar əks etdirilir. Hesab üzrə nizamlamalar aşağıdakı qaydada aparılır:

• uzunmüddətli hüquqi öhdəliklər yaradıldıqda, habelə onlar qısamüddətli kimi təsnifləşdirildikdə qeyd edilən qaydaların 35.13.-ci bəndi tətbiq edilir.
• belə öhdəliklər üzrə məzənnə fərqi yarandıqda mühasibat yazılışları qaydalarının 35.14.-cü bəndi ilə nizamlanır.
• uzunmüddətli hüquqi öhdəliklərin yerinə yetirilməsi zamanı görülən işlər və ya göstərilən xidmətlər üzrə müxabirləşmələr həmin qaydaların 35.15-ci, onlara görə hesablanmış əlavə dəyər vergisi ilə bağlı müxabirləşmələr isə 35.16.-cı bənd əsasında verilir.
• uzunmüddətli hüquqi öhdəliklər ilə əlaqədar görülən işlər və göstərilən xidmətlərin üçüncü şəxs tərəfindən ödənilməsi haqqında bəhs olunan qaydaların 35.17.-ci bəndi tətbiq edilir.

Uzunmüddətli öhdəliklər yaradıldıqda müxabirləşmə nümunələri

“A” MMC və “B” MMC arasında anlaşılmazlıq nəticəsində yaranan münaqişənin həlli üçün “A” MMC məhkəməyə müraciət etmişdir. Məhkəmə tərəfindən verilən qərar “A” MMC-nin lehinə olmuşdur və “B” MMC “A” MMC-ə cərimə ödəməlidir. Nəticədə yaranan 5000 manat dəyərindəki hüquqi öhdəliyin 3000 manatı “B” MMC tərəfindən qarşı tərəfin bank hesablaşma hesabına köçürüləcəkdir.

Xəbər verdiyimiz kimi Kapital Bank-ın 50 000 000 ABŞ dolları həcmində olan istiqraz emissiyasının birinci tranşı investorlar tərəfindən yüksək maraqla qarşılanıb. Belə ki, 30 000 000 ABŞ dollar həcmində emissiya olunan istiqrazlara investorlar tərəfindən 35 211 100 ABŞ dolları həcmində sifariş yerləşdirilib.

Qeyd olunan istiqrazların 20 000 000 ABŞ dolları həcmində olan ikinci tranşının abunə yazılışı 29 sentyabr 2024-cü il tarixində başlanılıb.

Kapital Bank-ın dollar istiqrazlarını əldə edən hər kəs gəlirini nə az, nə çox 7% artıra bilər. Maliyyə bazarının bu unikal təklifi müştərilərə aylıq gəlir qazandırır. Qeyd edək ki, istiqrazlar üzrə faiz ödənişləri vergidən azaddır. Eyni zamanda istiqrazların abunə yazılışı ilə bağlı bütün komissiyalar bank tərəfindən ödənilir.

Müştərilər dollar istiqrazlarını 29 okyabr 2024-cü il tarixinədək ən yaxın Kapital Bank filialından əldə edə bilərlər.

Ətraflı məlumat üçün: https://kbl.az/diit

Xatırladaq ki, təklif edilən istiqrazların hər birinin nominal dəyəri 100 dollar, illik faiz dərəcəsi 7%, ödəniş dövrü 30 gündən bir, tədavül müddəti 7 ildir. Sənədsiz, adlı, faizli, təmin edilməmiş istiqrazların yerləşdirmə üzrə anderrayteri “PAŞA Kapital İnvestisiya Şirkəti” QSC-dir.

Ölkənin birinci bankı olan Kapital Bank PAŞA Holding-ə daxildir və Azərbaycanda ən böyük filial şəbəkəsi, 119 filialı və 53 şöbəsi ilə müştərilərin xidmətindədir. Bankın məhsul və xidmətləri barədə daha ətraflı məlumat almaq üçün https://kapitalbank.az  saytına, 196 Sorğu Mərkəzinə və ya Bankın müxtəlif sosial şəbəkələrdə olan səhifələrinə müraciət edə bilərsiniz. Nağd pul krediti sifarişi üçün— https://kbl.az/prgtk, Birbank kartı sifarişi üçün — https://kbl.az/prcrc.