Blog Full

Müəssisənin daxilində işçinin vəzifəsinin dəyişdirilməsi müxtəlif səbəblərdən baş verə bilər. Məqalə keçirilmənin formaları, işçinin başqa işə keçirmə ərizəsi, onun hazırlanması barədədir.

Başqa işə keçirmə

Əmək Məcəlləsində (maddə 59) başqa işə keçirmə işçinin əmək funksiyasında dəyişiklik nəzərdə tutulur. Bu yalnız:

• işçinin razılığı əsasında;
• əmək müqaviləsinə əlavə və dəyişikliklər edilməklə;
• yeni əmək müqaviləsi bağlanmaqla həyata keçirilə bilər.

Başqa işə keçirilmə şərti olaraq müvəqqəti və ya daimi, işçinin razılığı tələb edilən və ya edilməyən, işçinin və ya işəgötürənin təşəbbüsü ilə baş tutun vəzifə dəyişiklikləri kimi qruplaşdıra bilərik.

Daimi başqa işə keçirmə işçinin əmək funksiyasında müddətsiz edilən dəyişikliklərdi. Bu zaman işçi:

• eyni işəgötürəndə başqa vəzifəyə keçir (məsələn, satış meneceri satış şöbəsinin müdiri təyin olunur, yaxud alət sexinin mexaniki montaj sexində mexanik vəzifəsinə keçir);
• işəgötürənlə birgə müəssisənin yerləşdiyi yaşayış məntəqəsinin inzibati hüdudlarından kənarda başqa əraziyə köçür (işçi qabaqcadan xəbərdar edilməlidir);
• digər müəssisəyə keçərək iş yerini dəyişir.

Müvəqqəti başqa işə keçirilmə:

• tərəflərin yazılı razılığı;
• işçinin razılığı;
• işçinin razılığı olmadan həyata keçə bilər.

Razılıq ərizəsi

Aşağıdakı hallarda işçidən başqa işə keçirilmə ərizəsi tələb olunur:

• eyni müəssisə daxilində başqa vəzifəyə keçdikdə;
• başqa müəssisəyə yeni işə keçdikdə;
• tərəflərin razılığı ilə və ya işçinin razılığı ilə müvəqqəti kadr dəyişiklikləri zamanı.

İşçinin razılıq ərizəsi olmadan istehsalat zərurəti və boşdayanma hallarının qarşısını almaq məqsədi ilə bir ay müddətinə, müvəqqəti olaraq başqa işə keçirilə bilər (ƏM, maddə 60). Bu zaman işçinin səhhətinə təsir edən mənfi amillər, habelə ixtisas uyğunluğu nəzərə alınmalıdır (aşağı ixtisaslı işə keçirilə bilməz).

Kadr uçotu prosesində  tələb olunan ərizə formaları

Başqa işə keçmək üçün ərizə forması

Ərizənin vahid forması yoxdur. Sənəd sərbəst formada tərtib edilir. İşçinin başqa işə keçirmə ərizəsinə işəgötürən, işçi və keçirilmə üçün əsas olan səbəb (əgər varsa) göstərilir. O, aşağıdakılar qeyd edilməklə yazılı formada hazırlanır:

• müəssisə rəhbərinin tam adı;
• işçinin vəzifəsi və tam adı;
• növbəti sətrin mərkəzində “Ərizə” yazılır;
• ərizənin məzmunu hissəsində başqa işə keçirilmə xahişi və bu xahişi əsaslandıran səbəb göstərilir.

Səhhətə görə vəzifənin dəyişdirilməsi zərurəti yaranarsa, ərizəyə təsdiqedici sənədlər əlavə edilməlidir (məsələn, tibbi komissiyanın rəyinə əsaslanan tibbi arayış).

Başqa işə keçirmə üçün ərizə formasına nümunəni yüklə

Keçirmə necə rəsmiləşdirilir?

1. Başqa işə keçirmə barədə işçi xəbərdar edilir. Xəbərdarlıq işəgötürən tərəfindən müvəqqəti başqa işə keçirilmə zamanı, vəzifənin dəyişdirilmə səbəbləri və son tarixlər göstərilməklə sərbəst formada tərtib edilir. Başqa işə keçirmə işçinin təşəbbüsü ilə olduqda buna ehtiyac yoxdur.
2. İşçidən başqa işə keçmək barədə razılıq alınır. Keçirilmə işəgötürənin təşəbbüsü ilə olduqda qanunvericiliyin tələbləri nəzərə alınmaqla ixtiyari formada hazırlanır. İşçinin təşəbbüsü ilə olduqda, işçi ixtiyari formada tərtib edilmiş başqa işə keçirilmə ərizəsini təqdim edir.
3. Əmək müqaviləsinə əlavə razılaşma (yaxud yeni əmək müqaviləsinin bağlanması). Başqa işə keçirilmə istənilən halda yalnız tərəflərin razılığı ilə mümkündür, ona görə də yeni razılaşma məcburidir. Bu, əmək müqaviləsində hansı dəyişikliklərin baş verdiyini, düzəlişlərin qüvvəyə minmə tarixini, tərəflərin rekvizit və imzalarını göstərir. Müvəqqəti keçirilmə halında, bunun nə qədər davam edəcəyini göstərilməlidir.
4. Başqa işə keçirmə haqqında əmr (sərəncam) hazırlanır. İşçinin hər hansı yerdəyişməsi halında əmr verilir. Onun formasını və doldurulma qaydası ilə buradan tanış olmaq olar. İşçi əmrlə tanış olaraq onu imzalayır.

Başqa işə keçirmə

İşəgötürən işçini  başqa struktur bölməyə və ya başqa vəzifəyə keçirmək hüququna malikdir və buna yalnız işçinin razılığı ilə, həmçinin yeni əmək müqaviləsi bağlamaqla yol verilir (AR Əmək Məcəlləsi maddə 59). Proses işçinin başqa işə keçirilmə əmri ilə rəsmiləşdirilməlidir.

Başqa işə keçirmə həm işçinin, həm də işəgötürənin təşəbbüsü ilə həyata keçirilə bilər və bu, yalnız hər iki tərəfin qarşılıqlı razılığı olduqda mümkündür. Əgər işin dəyişilməsi işəgötürənin təşəbbüsü ilə baş verərsə, işçiyə bu barədə məlumat verilir və onun yazılı razılığı alınır.

İşçinin yazılı ərizəsi və ya yazılı razılığı əsasında işçinin başqa işə keçirmə əmri verilir. Razılaşdırılmış dəyişikliklər əmək müqaviləsinə daxil edilir və yaxud da yeni əmək müqaviləsi tərtib olunur. Müqavilə iki nüsxədə hazırlanır, onlardan biri təşkilatda qalır, digəri isə işçiyə verilir.

Bəzi hallarda işçi, onun razılığı olmadan istehsalat zəruriyyəti ilə əlaqədar bir ay müddətinə, müvəqqəti olaraq başqa işə keçirilə bilər. Bu halda işçiyə görülən işin müqabilində, lakin əvvəlki orta əməkhaqqından az olmamaq şərtilə əməkhaqqı ödənilməlidir.

İşçinin ərizəsi

Əgər işçi öz təşəbbüsü ilə başqa vəzifəyə keçmək istəyirsə, o, müəssisə rəhbərinin adına ərizə yazmalıdır. Ərizənin doldurulması üçün vahid qayda yoxdur və o, istənilən formada tərtib edilir. Ərizədə məzmun hissədə işçinin başqa vəzifəyə keçmə sorğusu, onun əsl səbəbinin göstərilməsi vacibdir. Əgər işçinin səhhəti ilə əlaqədar vəzifəsinin dəyişdirilməsi zərurəti yaranarsa, ərizəyə təsdiqedici sənədlər əlavə edilməlidir (əmək qabiliyyətinin itirilməsi barədə arayış). Ərizədə:

• ərizənin ünvanlandığı şəxs (müəssisə rəhbərinin tam adı və vəzifəsi);
• ərizəni yazan şəxs (işçinin tam adı və vəzifəsi);
• başqa vəzifəyə keçirilmək üçün birbaşa müraciət (işçinin razılığını ifadə edən mətn);
• əvvəlki və yeni iş yeri;
• işçinin tam adı və imzası;
• ərizənin tarixi qeyd edilir.

Başqa işə keçirmə üçün ərizə formasına nümunəni yüklə

Başqa işə keçmə əmri

İşçinin  ərizəsi (razılığı) alındıqdan sonra onun başqa işə keçirilməsi əmrlə rəsmiləşdirilir.

Əmrdə aşağıdakı məlumatlar qeyd olunur:

• təşkilatın adı;
• əmrin nömrəsi və onun hazırlanma tarixi;
• işçinin adı, atasının adı və soyadı;
• işlədiyi struktur bölmə, habelə tutduğu vəzifə;
• başqa vəzifəyə keçirilmə növü – müvəqqəti və ya daimi;
• başqa işə keçirilmə səbəbi;
• yeni iş yeri və müddəti;
• işçinin işə başlama tarixi;
• müəssisə rəhbərinin imzası;
• işçinin imzası.

Əmr müəssisə rəhbərinin imzası ilə təsdiqlənir. İşçi əmrlə tanış olmalı və öz razılığını bildirməlidir.

Başqa işə keçirmə üçün əmr formasına nümunəni yüklə