Blog Full - Muhasibat.Az

Oxunma sayı: 136. 460

19 Fev 2018

Bakıda II Maliyyə və İnvestisiya Forumu keçiriləcək

by | posted in: Maliyyə, Xəbər | 0

5 may 2018-ci il tarixində Bakı şəhərində, “Pullman” oteldə ölkəmizin aparıcı şirkətlərinin dəstəyi və iştirakı ilə II Maliyyə və İnvestisiya Forumu (FIF2018) “Rəqəmsal biznes trendləri” devizi ilə keçiriləcək.

Bu ilki forumun əsas məqsədi Azərbaycanda rəqəmsal iqtisadiyyatın inkişafının genişləndirilməsi, bu sahənin hüquqi və infrastruktur bazasının beynəlxalq tələblərə uyğunlaşdırılmasıdır.

Forum ötən il olduğu kimi, 3 paneldən ibarət olmaqla günboyu davam edəcək. “İnvestisiya strategiyaları”, “Maliyyələşmə strategiyaları”, “Vergi siyasəti və mühasibat uçotu” adlı panellərdə toplam 12 yerli və xarici spikerin çıxışı planlaşdırılır. Forumda özəl şirkətlərlə yanaşı əlaqəli dövlət qurumlarından rəsmilər də iştirak edəcəklər.

“Keçiriləcək tədbir sayəsində dövlət və özəl biznes subyektləri arasında konstruktiv əlaqələrin, bilgi paylaşımının olması, ümumilikdə, sektora müsbət təsir edəcək. Maliyyə, vergi, audit, mühasibatlıq sahəsində çalışan menecerlər, sahibkarlar və ümumiyyətlə, bizneslə əlaqəli hər kəs bu forumda iştirak edə bilər”, – deyə təşkilatçılar bildiriblər.

Xatırladaq ki, ilk forum 2017-ci il mayın 5-də 200-dək şirkətin 400-dən çox menecerinin iştirakı ilə keçirilib.

Ən son mühasibat xəbərlərini qaçırmaq istəmirsinizsə, bu linkə daxil olaraq XƏBƏRLƏRƏ ABUNƏ OLUN.

19 Fev 2018

Vergilər Nazirliyindən yenidən xəbərdarlıq!!!

by | posted in: Vergi, Xəbər | 0

Vergilər Naziri bu gün vergi ödəyicilərinə şəffaflıqla bağlı müraciət edib.

Nazir müraciətdə bildirir ki, vergi sistemində həyata keçirilməsinə başlanılmış şəffaflığın təmin edilməsi və vergi ödəyiciləri ilə vergi orqanları arasında qarşılıqlı etimadın yüksəldilməsi prinsipləri vergi ödəyicilərinin də öz öhdəliklərinə qanunauyğun yanaşmasını tələb edir. Şəffaflıq yalnız vergi orqanlarının fəaliyyətini deyil, eyni zamanda vergi ödəyicilərinin də öz öhdəliklərinə düzgün yanaşmasını əhatə etməlidir. Vergilərini tam həcmdə və vaxtında ödəyən hər bir intizamlı ödəyici vergi orqanlarının etibarlı tərəfdaşı olacaq və belə ödəyicilər daim dəstəklənəcəkdir.

Vergi hesabatına bilərəkdən saxta məlumatları daxil edənlər və vergidən yayınmağa cəhd göstərənlər isə qanun qarşısında cavab verəcək, onlarla sərt, lakin qanunun müəyyən etdiyi çərçivədə davranılacaqdır. Kiçik və ya böyüklüyündən asılı olmayaraq, hər bir vergi ödəyicisi öz vergi öhdəliyinə əməl etməli, ikili mühasibatlığın aparılması, vergiyə cəlb olunan dövriyyələrin gizlədilməsi, vergidən yayınma halları aradan qaldırılmalıdır.

Sahibkarların öz vergi öhdəliklərini rahat şəkildə yerinə yetirməsi üçün mövcud sistem, vergi ödəyicilərinə göstərilən xidmətlər ödəyicilərin gözləntilərinə və tələblərinə uyğun şəkildə təkmilləşdiriləcəkdir.

Vergi sistemində kadrların yenidən komplektləşdirilməsi, barəsində şikayətlər daxil olan vergi məmurları haqqında ölçü götürülməsi, peşəkarların irəli çəkilməsi ilə bağlı tədbirlərə də başlanılmışdır.

Vergilər Nazirliyi ödəyicilərə keyfiyyətli xidmətlər, qarşılıqlı etimad təklif edir, onları eşitməyə, qanuni tələblərinin həllinə kömək göstərməyə hazırdır. Vergi ödəyicilərindən isə intizamlı olmaq və vergi qanunvericiliyinin tələblərinə tam əməl etmək tələb olunur.

Ən son mühasibat xəbərlərini qaçırmaq istəmirsinizsə, bu linkə daxil olaraq XƏBƏRLƏRƏ ABUNƏ OLUN.

19 Fev 2018

Büdcə təşkilatlarında çalışan mühasiblər üçün Ödənişsiz seminar

by | posted in: muhasibat, Xəbər | 0

Büdcə təşkilatlarında çalışan mühasiblərin nəzərinə!

2018-ci il 24 fevral tarixində Maliyyə Elm-Tədris Mərkəzində saat 14.00-da “Büdcə təşkilatlarında maliyyə hesabatlarının hazırlanmasına metodiki köməklik” mövzusunda ödənişsiz seminar keçiriləcəkdir.
Qeydiyyatdan keçməyə tələsin, yerlər məhduddur.
Əlaqə nömrəsi: 012 404 81 59.
Ünvan: Bakı şəhəri, Heydər Əliyev prospekti 10.

Linkə daxil olmaqla seminar haqqında geniş məlumat əldə edə bilərsiniz.

Mənbə: Maliyyə Elm – Tədris Mərkəzi.

Ən son mühasibat xəbərlərini qaçırmaq istəmirsinizsə, bu linkə daxil olaraq XƏBƏRLƏRƏ ABUNƏ OLUN.

19 Fev 2018

Mühasibat – Peşə xüsusiyyətləri (1-ci hissə)

by | posted in: muhasibat, Məqalə, Xəbər | 0

Qısa təsvir

Mühasib peşəsi – əmək bazarında ən çox tələb olunan peşələrdən biridir. İstənilən təşkilatın kadrlarla bağlı ştat cədvəli özündə mühasib vəzifəsini nəzərdə tutur, iri müəssisələrdə isə hətta bir neçə mühasib vəzifəsi nəzərdə tutulur ki, onların hər biri konkret sahələr üzrə işlə məşğul olur. Mühasib işi çoxplanlıdır: əsas vəsaitlərin, maddi dəyərlərin uçotu, tədarükçülər və sifarişçilərlə hesablaşma, əmək haqqlarının, vergilərin ödənişi və s. Uçotun düzgün aparılması və hesabatın vaxtında təqdim olunmasına Baş mühasib cavabdehdir. Kiçik müəssisələrdə isə bütün mühasibatlıq işlərini bir mühasib yerinə yetirir.

Peşənin spesifikliyi

Mühasibin işi aşağıdakı funksiyaları yerinə yetirməkdir:

Mühasibat və vergi uçotunun aparılması;
Dövri hesabatların hazırlanması və onların vergi orqanlarına və dövlət fondlarına təqdim edilməsi;
Təşkilatın əməkdaşlarına əmək haqqlarının hesablanması və köçürülməsi;
Kassa və əlaqəli sənədlərin aparılması.

Peşənin müsbət tərəfləri

Mühasib peşəsi digər peşələrlə müqayisədə daha çox tələb olunandır. Mühasib işi bir qayda olaraq normalaşdırılmış iş günündən ibarət olur. Mühasib eyni zamanda bir neçə kiçik müəssisədə çalışa bilır ki, bu da ona əlavə qazanc gətirə bilər. Mühasib peşəsi prestijli iş sahəsi hesab olunur: Müəssisələrdə mühasib idarəetmə personalına aid edilir.

Peşənin mənfi tərəfləri

Yüksək səviyyəli məsuliyyətin zəruriliyi: Maliyyə uçotu və vergi ödənişləri ilə bağlı buraxılmış səhvlər cinayət məsuliyyətinə gətirib çıxara bilər.

İş yeri

İqtisadiyyatın müxtəlif sahələrinə aid istənilən dövlət təşkilatı; (sənaye, tikinti, kənd təsərrüfatı, xidmət sahəsi və s.)
Kiçik və orta sahibkarlıq müəssisəsi;
Maliyyə təşkilatları: vergi müfəttişliyi, sığorta agentlikləri, pensiya fondları;
Banklar, investisiya fondları.