Blog Full - Muhasibat.Az

Oxunma sayı: 153. 138

13 Fev 2026

Fiziki şəxslərin gəlir vergisi hansı dərəcələr üzrə hesablanır?

by muhasibat az | posted in: Vergi, Xəbər | 0

Gəlir vergisinin dərəcələri onu müəyyən edən əsas elementlərdəndir (Vergi Məcəlləsi, maddə 12). Fiziki şəxsin gəlir vergisinin dərəcəsi gəlirin mənbəyindən, onun aid olduğu kateqoriyadan asılıdır. Muzdlu işdə çalışan, sahibkarlıq və qeyri-sahibkarlıq fəaliyyəti ilə məşğul olan fiziki şəxslərin gəlir vergisi dərəcəsi fərqlənir. Bu kateqoriyaların da daxilində müxtəlif gəlir vergisi faizi tətbiq edilir.

Muzdlu işlə bağlı tətbiq edilən vergi dərəcəsi

İşçilərin əməkhaqlarına tətbiq edilən gəlir vergisinin dərəcələri onun məbləğindən, habelə işəgötürənin fəaliyyət sektorundan asılıdır. Fəaliyyət sektoruna görə vergi ödəyiciləri aşağıdakı kimi qruplaşdırılır:

neft-qaz yaxud dövlət sektorunda çalışanlar;
fəaliyyəti neft-qaz sahəsinə aid olmayan və qeyri-dövlət sektoruna aid edilənlər;
İT sahəsində çalışan vergi ödəyicilərində işləyən müəyyən kateqoriya fiziki şəxslər.

Neft-qaz yaxud dövlət sektorunda gəlir vergisi dərəcələri

Neft-qaz sektoru, yaxud dövlət sektoru meyarlarına uyğun gələn işəgötürənin işçilərinə tətbiq etdiyi gəlir vergisinin dərəcələri aşağıdakı cədvəldə göstərilib (VM, maddə 101.1)

Qeyri neft-qaz (yaxud qeyri dövlət) sektorunda gəlir vergisi

Neft-qaz sektoru yaxud dövlət sektoruna aid olmayan işəgötürənin işçilərinə 01 yanvar 2026-ci ilə qədər qüvvədə olan aşağıdakı gəlir vergisi dərəcəsi tətbiq edilir (VM, maddə 101.1-1).

“0” faiz dərəcəni vergi güzəştləri ilə səhv salmayın. Bu güzəşt deyil, muzdlu işdən gəlirlərə “0” faiz dərəcəsinin tətbiqidir. Düzdür, bunun mahiyyətini stimullaşdırma, güzəşt təşkil edir, amma aşağı dərəcəni güzəştlə səhv salanda, bəzən yanlış qərarlar qəbul etmiş oluruq.

İT sektorunda çalışan fiziki şəxslərin gəlir vergisi dərəcələri

Texnologiyalar parkından kənarda texnologiyalar parkının rezidenti kimi aşağıdakı fəaliyyət növləri ilə məşğul olan vergi ödəyicilərinin işçilərinə güzəştli gəlir vergisi faizi tətbiq edilir:

sistem inteqrasiyası;
proqram təminatının hazırlanması;
proqram təminatının inkişaf etdirilməsi.

Güzəştli gəlir vergisi dərəcəsi iki dövr üçün nəzərdə tutulub (AR VM, maddə 101.7.):

01 yanvar 2023-cü il tarixdən 3 il müddətinə;
01 yanvar 2026-cı il tarixdən 7 il müddətinə.

Birinci 3 illik dövrdə muzdlu işdən əldə edilən aylıq gəlir 8000 manatadək olduqda gəlir vergisi faizi “0” kimi tətbiq edilir. 8000 manatdan yuxarı məbləğ üçün hesablamalar 5%-lik gəlir vergisi dərəcəsi ilə aparılır.

Növbəti 7 illik dövrdə isə aylıq gəlirin 5%-i miqdarında vergi dərəcəsi tətbiq olunur.

Vergi dərəcələrinin tətbiqi

Gəlir vergisinin dərəcələrinin tətbiqi işçinin əsas yaxud əlavə iş yeri kimi çalışmasından asılı deyil, hər bir iş yerində muzdlu işlə bağlı gəlirlərdən ayrıca hesablanaraq büdcəyə ödənir.

Nümunə 1: Fiziki şəxs Ş.H. Məmmədov həm orta məktəbdə, həm də ali məktəbdə müəllim işləyərək əməkhaqqı alır. Onun aldığı əməkhaqqı orta məktəbdə 240 manat, ali məktəbdə isə 470 manat təşkil edir. Ş.H. Məmmədovun hər bir iş yerindən aldığı əməkhaqqıdan ayrılıqda vergi tutulmalıdır.

Nümunə 2: Fiziki şəxs neft şirkətində çalışır. Onun ilk iş ayı üzrə muzdlu işdən gəliri 3500 manat təşkil edir. Onun gəlirindən 14% faiz gəlir vergisi dərəcəsi tətbiq edilməklə 490 manat (350 + 1000*14%) vergi tutulmalıdır.

Nümunə 3: Neft-qaz sektoruna aid olmayan özəl şirkətdə 5 işçi var, hər biri aylıq 1200 AZN maaş alır. Onların hər birinin əməkhaqları 8000 manatdan az olduğuna görə gəlir vergisi faizi “0” olacaq və vergiyə cəlb edilməyəcək.

Müəssisənin hansı fəaliyyət sektoruna aid olduğunu dəqiqləşdirmək üçün AR NK-nın 18/02/2019-cu il tarixli 56 saylı qərarı ilə tanış olmaq lazımdır.

Muzdlu işə aid olmayan fəaliyyətdən gəlir vergisi dərəcələri

Belə gəlirlər müxtəlif mənbələrdən əldə edilə bilər. Bunların bəzilərinə tətbiq olunan dərəcələrə baxaq.

Fiziki şəxsin gəlirləri hər hansı işin görülməsindən, yaxud xidmət göstərilməsindən də yarana bilər. Bu zaman əmək müqaviləsi bağlanmır, tərəflər arasında əmək münasibəti yaranmır. Belə münasibətlərin əsasını mülki hüquqi müqavilə – xidmət müqaviləsi təşkil edir. Xidməti müqavilə üzrə ödəniş edilən şəxslərdən vergi yuxarıda qeyd etdiyimiz VM 101.1-ci maddəsinə uyğun gəlir vergisinin dərəcələri tətbiq edilir.

Nümunə 4: Hüquqi şəxs ofisinin təmirini əl qabiliyəti yaxşı olan bir fiziki şəxsə həvalə edir. Həmin şəxs vergi ödəyicisi kimi uçota alınmamışdır. Təmirin sonunda bağlanmış mülki hüquqi müqaviləyə əsasən ustaya 2200 manat ödəniş edilməlidir. Ödənişi icra edən vergi ödəyicisi ondan 14 % gəlir vergisi dərəcəsi tətbiq etməklə vergi tutub 308 manat vergini dövlət büdcəsinə ödəməlidir.

Ümumiyyətlə, müəyyən istisnalarla, qeyri-sahibkarlıq fəaliyyəti üzrə gəlirlər 14% dərəcə ilə vergiyə cəlb edilir.

Nümunə 5: Fiziki şəxs mediatorluqla məşğuldur. Onun həmin fəaliyyətlə bağlı əldə etdiyi gəlirə 14%-lik gəlir vergisi dərəcəsi tətbiq olunur.

Hüquqi şəxs yaratmadan sahibkarlıq fəaliyyətilə məşğul olan fiziki şəxsin gəlir vergisi faizi eynilə hüquqi şəxslərdəki kimi – 20% olacaq.

Nümunə 6: Fərdi sahibkar özünə məxsus təsərrüfat subyektində qələm istehsalı və satışı ilə məşğul olur. Hesabat ili ərzində 15000 AZN gəlir əldə etmiş, bu gəlirin əldə edilməsi ilə bağlı 9500 AZN gəlirdən çıxılan xərcləri olmuşdur. Bu zaman 20% gəlir vergisi dərəcəsi tətbiq olunur. Dövlətə ödənməli olan verginin məbləği belə olacaq: (15.000 – 9500) * 20 % = 1100 manat.

İdman mərc oyunlarında gəlir vergisi nə qədərdir?

Rezident və qeyri-rezident fiziki şəxslərin müxtəlif idman mərc oyunlarından, habelə uduşlu lotoreyalardan mükafatları onların gəliri hesab olunuraq ödəmə mənbəyində 10 % gəlir vergisi dərəcəsi tətbiq edilir.

Nümunə 7: Fiziki şəxs “Topaz” idman oyunlarından 1200 AZN uduş qazanmışdır. Həmin uduş məbləği qeyri-sahibkarlıqdan gəlirə aid olduğu üçün ödəmə mənbəyində vergiyə cəlb edilməlidir. Ödəmə mənbəyində uduşla bağlı qoyulmuş məbləğ çıxıldıqdan sonra idman mərc oyunlarının satıcısı 10 % gəlir vergisi dərəcəsi tətbiq edilməklə dövlət büdcəsinə ödənilməlidir.

Vergi Məcəlləsinə əsasən hansısa daşınar aktivlər sahibkarlıq fəaliyyəti çərçivəsində təqdim edilmirsə vergidən azaddır. İstisna edilən nağdsız hesablaşmaları tənzimləyən qanunvericilik aktının 3.5-ci maddəsində göstərilmiş malların satışıdır.

Nümunə 8: Hüquqi şəxs yaratmadan sahibkarlıq fəaliyyəti ilə məşğul olan şəxs pərakəndə satış mağazasında satmaq üçün vergi ödəyicisi olmayan fiziki şəxslərdən alış aktı əsasında kənd təsərrüfatı məhsulları almışdır. Ödəmə mənbəyində vergi tutulmayacaq. Belə ki, bununla bağlı 2014-cü ildən etibarən 10 illik azadolma vardır.

Muzdlu işlə bağlı gəlir vergisi üzrə azadolmalar və güzəştlər haqqında buradan daha ətraflı məlumat almaq olar. Fiziki şəxslərin gəlir vergisi dərəcələrinin tətbiqi, vergi məbləğinin hesablanması barədə daha geniş məsləhət almaq istəsəniz vergi konsultasiyası xidmətindən istifadə edə bilərsiz.

Gəlir vergisinin dərəcələri vergitutma bazasına tətbiq edilir və fiziki şəxsin dövlət büdcəsi qarşısında öhdəlikləri hesablanır.

Material ehtiyatları, yarımfabrikatlar və hazır məhsul

12 Fev 2026

Könüllü açıqlamanın əhatə dairəsi genişləndirilib

by muhasibat az | posted in: Xəbər | 0

Vergi Məcəlləsinin 13.2.49-2-ci maddəsində edilmiş dəyişikliyə əsasən, könüllü açıqlamanın əhatə dairəsi genişləndirilir. Yeniliyi iqtisadçı ekspert Anar Bayramov şərh edib.

Dəyişikliyə qədər könüllü açıqlama dedikdə, səyyar vergi yoxlaması başa çatdıqdan sonra yoxlama zamanı aşkar edilməyən və vergi öhdəliyinin, habelə, məcburi dövlət sosial sığorta, işsizlikdən sığorta və icbari tibbi sığorta haqları üzrə öhdəliyin yaranmasına səbəb olan halların vergi ödəyiciləri tərəfindən vergi orqanlarına könüllü olaraq bəyan edilməsi başa düşülürdü.

Vergi Məcəlləsində edilmiş son dəyişikliyə əsasən, könüllü açıqlama – səyyar vergi yoxlaması və ya üfüqi monitorinq başa çatdıqdan sonra yoxlama (monitorinq) zamanı aşkar edilməyən və vergi öhdəliyinin, habelə məcburi dövlət sosial sığorta, işsizlikdən sığorta və icbari tibbi sığorta haqları üzrə öhdəliyin yaranmasına səbəb olan halların vergi ödəyiciləri tərəfindən vergi orqanlarına könüllü olaraq bəyan edilməsi, habelə səyyar vergi yoxlamasının keçirilməsindən asılı olmayaraq, həmin halların bu Məcəllənin 85.5-ci maddəsində göstərilən 3 illik müddətdən əvvəlki dövrlər üzrə könüllü olaraq bəyan edilməsidir.

Öncə bildirək ki, könüllü açıqlamanın vergi ödəyicisi üçün üstünlüyü odur ki, bu halda vergi ödəyicisinə hər hansı maliyyə sanksiyası və ya əlavə faizlər hesablanmır, vergi ödəyicisi yalnız könüllü açıqlama üzrə müəyyən edilmiş vergi borcunu ödəyir. Dəyişiklikləri müqayisə etdikdə belə anlaşılır ki, könüllü açıqlama ilə bağlı iki hal əlavə edilib. Birinci hal ondan ibarətdir ki, üfüqi monitorinq başa çatdıqdan sonra da vergi ödəyicisi könüllü açıqlama edə bilər. Qeyd edək ki, “üfuqi monitorinq” anlayışı da 1 yanvar 2026-ci il tarixdən Vergi Məcəlləsinə daxil edilib. Bu haqda növbəti məqalələrdə açıqlama veriləcək.

Misal 1

Vergi orqanı tərəfindən vergi ödəyicisində 2027-ci ildə üfuqi monitorinq aparılıb. Vergi ödəyicisinin 2028-ci ildə üfüqi monitorinq həyata keçirilən 2027-ci il üzrə könüllü açıqlama verməsinə icazə verilir. Dəyişikliyə qədər isə vergi ödəyicisinin yalnız səyyar vergi yoxlaması aparıldıqdan sonra könüllü açıqlama həyata keçirilməsinə icazə verilirdi.

İkinci hal isə Vergi Məcəlləsində göstərilən 3 illik müddətdən əvvəlki dövrlər üzrə könüllü olaraq bəyan edilmədir. Qeyd edək ki, Məcəllənin 85.5-ci maddəsinə əsasən, vergi ödəyicisi vergi hesabatı dövrü qurtardıqdan sonrakı 3 il ərzində ondan düzgün tutulmamış vergilərin, faizlərin və maliyyə sanksiyalarının hesablanmasını və hesablanmış məbləğin yenidən hesablanmasını, artıq ödənilmiş vergi, faiz və maliyyə sanksiya məbləğlərinin qaytarılmasını və ya əvəzləşdirilməsini vergiyə cəlb edilən hesabat dövrü qurtardıqdan sonra (bu Məcəllənin 38.3.3-cü və 38.3.4-cü maddələrinə uyğun olaraq həyata keçirilən səyyar vergi yoxlamasının nəticələri üzrə çıxarılmış qərarın tarixindən etibarən) 5 il ərzində tələb etmək hüququna malikdir.

Misal 2

Vergi ödəyicisi 2026-cı ildə 2021-ci ilin vergi bəyannaməsi üzrə könüllü açıqlama edə biləcək. Burada diqqət yetiriləsi məqam ondan ibarətdir ki, vergi ödəyicisinə Vergi Məcəlləsinin 85-ci maddəsində qeyd edilən 3 illik müddətdən əvvəlki dövr üzrə könüllü açıqlama üzrə bəyannamə təqdim etmək imkanı yaradılır.

Bir məsələni də qeyd etmək lazımdır ki, bəzi hallarda vergi ödəyiciləri mənfəət və ya gəlir vergisi üzrə bəyannamələrdə könüllü açıqlama həyata keçirməklə yalnız yaranmış vergi öhdəliyini bəyan etməklə kifayətlənmir, eyni zamanda bəyannamənin 1 saylı Əlavəsində mövcud olan uyğunsuzluqları da aradan qaldırmaq imkanına malik olurlar. Məsələn, vergi ödəyicisi beş il əvvəl təqdim etdiyi bəyannamədə mülkiyyətində olan hər hansı aktivini bəyan etməmişdirsə, könüllü açıqlama zamanı həmin hesabatda bu kənarlaşmanı da aradan qaldıra bilər. Təbii ki, qeyd olunan hallar üzrə vergi orqanı tərəfindən uyğunsuzluq məktublarının göndərilməsi ehtimalı mövcuddur. Belə hallarda vergi orqanından daxil olan kənarlaşmaya vergi ödəyicisi tərəfindən əsaslandırılmış cavabın təqdim edilməsi zərurəti yarana bilər.

Mənbə: vergiler.az

Sərnişinlərin icbari fərdi qəza sığortasında fərqli yanaşmalar: yenilik gözlənilir

12 Fev 2026

Sərnişinlərin icbari fərdi qəza sığortasında fərqli yanaşmalar: yenilik gözlənilir

by muhasibat az | posted in: Xəbər | 0

Azərbaycanda hava, quru və dəmir yolu nəqliyyatından istifadə edən sərnişinlərin icbari fərdi qəza sığortası aktuallaşıb. Artıq İcbari Sığorta Bürosu (İSB) və aidiyyəti dövlət qurumları bu sığorta növündə penetrasiyanın artırılması istiqamətində birgə müzakirələr aparırlar. İSB isə bununla bağlı ayrıca yeni layihələr hazırlayıb.

Bu barədə sualları cavablandıran İcbari Sığorta Bürosunun icraçı direktoru Vüsal Məsiyev bildirib ki, 3 il öncə avtonəqliyyat vasitəsi sahiblərinin mülki məsuliyyətinin icbari sığortasındakı yanaşmaların sərnişinlərin icbari fərdi qəza və daşınmaz əmlak sığortasında tətbiq edilməsi mümkündür: “2025-2027-ci illər sığorta sektorunun inkişafı strategiyasında yer alan bu məsələ ilə bağlı Mərkəzi Bankla müzakirələr aparırıq. Məqsəd odur ki, icbari növlər üzrə təyin edilən sığortalar artıq vətəndaşlar tərəfindən təmin olunsun. Məcburi xarakterli olmadığı üçün daha çox onun fəlsəfəsini başa düşərək həyata keçirilməsini təmin etmək lazımdır. Vətəndaşlar əmlaklarını sığortalayan zaman nə əldə edəcəklərini bilməlidirlər”.

İSB-nin məlumatına əsasən, indiyədək 190 min 925 daşınmaz əmlak üzrə icbari sığorta şəhadətnaməsi alınıb. Daşınmaz əmlakın istismarı ilə bağlı mülki məsuliyyətin sığortası üzrə müqavilələrin sayı 21 min 893 ədəd təşkil edir. Sərnişinlərin icbari fərdi qəza sığortası üzrə şəhadətnamələrin sayı isə xüsusilə azdır – cəmi 200 ədəd. V.Məsiyev bu rəqəmlərin yüksəldilməsi üçün layihələr hazırlandığını vurğulayıb. Bildirib ki, layihələr Rəqəmsal İnkişaf və Nəqliyyat Nazirliyi ilə birgə hazırlanıb və sərnişin daşıyan bütün nəqliyyat vasitələrindən istifadə edən vətəndaşların icbari fərdi sığortası üzrə vahid və rahat mexanizmin formalaşdırılmasını nəzərdə tutur: “Məqsəd inteqrasiyaları tamamlamaqla sığorta prosesini daha əlçatan və operativ etməkdir. Düşünürəm ki, bu ilin sonunadək müəyyən mexanizmlər tətbiq olunacaq ki, sərnişin daşıyan bütün nəqliyyat vasitələri rahat şəkildə sığortalansın və bu sahədə hər hansı problem yaranmasın. Bu istiqamətdə Rəqəmsal İnkişaf və Nəqliyyat Nazirliyi, eləcə də Mərkəzi Bankla birgə reyestrlərin formalaşdırılması və həmin reyestrlərlə inteqrasiyanı nəzərdə tutan işlər aparılır. Hazırda Daxili İşlər Nazirliyi ilə inteqrasiyamız var. Nəqliyyat vasitəsinin dövlət qeydiyyat nişanını daxil etdikdə bütün məlumatlar avtomatik əldə olunur. Eyni yanaşmanı sərnişin daşıyan bütün nəqliyyat vasitələri üzrə də tətbiq etməyi planlaşdırırıq”.

Xatırladaq ki, 2023-cü ildən avtonəqliyyat vasitəsi sahiblərinin mülki məsuliyyətinin icbari sığortasında yeni yanaşmalar tətbiq olunur. İSB-nin icraçı direktorunun müavini Seymur Mirzəyev bununla bağlı bildirib ki, sistemdə sığorta haqları və ödənişlərinin hesablanması zamanı sürücünün yaşı, təcrübəsi, avtomobilin ishehsal tarixi, nəqliyyat vasitəsinin idarə edildiyi ərazilər və digər amillər əsas götürülür: “Artıq hər kəsə eyni deyil, şəxsi məlumatlara uyğun yanaşma tətbiq edilir. Bu, hər bir sürücüyə münasibətdə tarifin müəyyən edilməsidir. Məlumatlara əsasən, avtonəqliyyat vasitəsi sahiblərinin mülki məsuliyyətinin icbari sığortası üzrə müqavilələrin rəsmiləşdirilməsində hər il artım qeydə alınır. Bu, həm də ölkəyə gətirilən nəqliyyat vasitələrinin sayının artması ilə əlaqədardır. Buna mütənasib olaraq, sığorta hadisələrinin sayında, nəticə etibarilə sığorta ödənişlərində və orta zərər məbləğində artım müşahidə edilir”.

Qeyd edək ki, 2025-ci ildə İcbari Sığorta Bürosunun dayanıqlı maliyyə və zəmanət fondu üzrə investisiya portfelinin gəlirliliyi proqnozları üstələyib. Nəticədə investisiya portfelinin dəyəri artıb, hədəf olaraq müəyyən edilmiş 5,9 milyon portfel gəliri 6,5 milyon manat səviyyəsində icra olunub.

Mənbə: vergiler.az

İstifadə olunmayan əsas vəsaitlərə görə əmlak vergisi hesablanmalıdırmı?

12 Fev 2026

İdman mərc oyunları və lotereyalarda sadələşdirilmiş vergi

by muhasibat az | posted in: Xəbər | 0

Mərc oyunlarında sadələşdirilmiş vergi dərəcələri

Vergi Məcəlləsinin tələblərinə əsasən idman mərc oyunları məcburi qaydada sadələşdirilmiş vergiyə cəlb edilən fəaliyyət sahəsidir. Mərc oyunları, oyun zamanı baş verəcək hadisələrin, yarışların nəticələrinin qabaqcadan, düzgün proqnozuna əsaslanaraq keçirilir, qalib gəlmiş şəxslər pul ilə mükafatlandırılır. Qanunvericiliyə əsasən bu oyunun həm satıcıları olur, həm də operatorları. Onların hər ikisinin sadələşdirilmiş vergiyə cəlb edilməsi məcburidir.

Operator mütləq akkreditasiya edilmiş hüquqi şəxs olmalıdır, satıcı isə fiziki şəxs də ola bilər. Satıcı:

bütün əməliyyatları mərkəzləşdirilmiş sistemə bağlı olaraq təşkil edən agentdir;
operatorla müqavilə əsasında fəaliyyət göstərir;
ondan komissiya haqqı alır.

İdman mərc oyunları operatoru idman mərc oyunları biletlərinin satışından əldə etdiyi vəsaitə 6 faiz, idman mərc oyunlarının satıcısı isə idman mərc oyunlarının operatorunun ona verdiyi haqdan (mükafatdan) 4 faiz dərəcə ilə sadələşdirilmiş vergi hesablayır. Hesablama zamanı vergiyə cəlb olunan məbləğdən iştirakçılara ödənilmiş mükafat məbləği çıxılmır. Eyni zamanda idman mərc oyunlarının operatoru satıcıya verdiyi haqq (mükafat) verginin hesablanması zamanı nəzərə almır.

Nümunə: Mərc oyunlarının satıcısı bilet satışından 13500 manat əldə edib. Qalib şəxslərə 2200 manat uduş verilib. Operator satıcıya 4200 manat haqq (mükafat) ödəyib. Hər ikisi üçün sadələşdirilmiş vergisinin məbləği aşağıdakı kimi olacaq.

Bəyannamə və hesabatların hazırlanması kursu

Lotereya satışında vergilər

2021-ci ilin sonunda Vergi Məcəlləsinə edilmiş son dəyişikliklərə əsasən lotereya biletlərinin satışını həyata keçirən şəxslə, həmçinin lotereya təşkilatçıları da məcbur sadələşdirilmiş vergi ödəyicisidir. Təşkilatçı satışdan qazanılmış məbləğdən 6%, satıcı isə ona verilmiş haqdan (mükafatdan) 4% sadələşdirilmiş vergi hesablayır.

Sonuncu dəyişikliklərə əsasən lotereya biletlərinin satıcısı əgər lotereya biletini təşkilatçıdan deyil, özündən əvvəlki satıcıdan almışdırsa onun gəlirləri sadələşdirilmiş vergidən azaddır.

Onu da qeyd edək ki, iştirakçılara münasibətdə belə uduşlar qeyri-sahibkarlıq fəaliyyətindən gəlirlərə daxil edilir və ödəmə mənbəyində vergi tutulur. Vergi tutulan zaman oyuna qoşulmaq üçün ödənilmiş məbləğ nəzərə alınır. Verginin dərəcəsi 10%-dir. Həm lotereya, həm də mərc oyunlarında pul formasında qazanılmış uduşun 500 manatı vergidən azaddır.

Vergi hesabatlarının təqdim edilməsi

Məlumdur ki, bəzi hallar istisna olmaqla, vergi hesablandıqdan sonra onun bəyan edilməsi tələbi qanunla tələb olunur. Vergilər, onlar üçün müəyyən edilmiş müddətdə bəyan edilməli və ödənməlidir. Verginin bəyan edilməsi müddəti adətən onun üçün müəyyən edilmiş hesabat dövrü bitdikdən sonra başlayır. Sadələşdirilmiş vergi üçün hesabat dövrü rübdür. Bəyannamə əvvəlki rüb üçün yeni rübün ilk ayının 20-sindək təqdim edilir.

Sadələşdirilmiş verginin ödəyicisi olmuş şəxs fəaliyyətini dayandırsa da, uçotdan çıxsa da, eyni qaydada, yəni rüb bitəndən sonra növbəti ayın 20-sinə kimi vergi hesabatı təqdim edir. Analoji olaraq operator və satıcı olan şəxslər rüblük hesablanmış sadələşdirilmiş vergi üçün rüb bitəndən sonra, yeni rübün ilk ayının 20-dən gec olmamaqla Dövlət Vergi Xidmətinin müəyyən etdiyi xüsusi formaya əsasən vergi orqanına hesabat verməli, habelə eyni müddətə qədər vergi məbləğini büdcəyə köçürməlidirlər.

Uduşlar (mükafatlar) əldə edən şəxsə ödəmələr verən şəxslər ödəmə mənbəyində vergini tutmağa, ay bitdikdən sonra növbəti ayın 20-sinədək “Uduşlardan əldə edilmiş gəlirlərdən ödəmə mənbəyində tutulan verginin bəyannaməsi”ni təqdim etməyə borcludur.