Müqaviləsiz işçilərə görə vergi güzəştləri ləğv ediləcək
Rusiya Dövlət Dumasının Əmək komitəsinin üzvü Oleq Şeinin hazırladığı qanun layihəsinə əsasən, öz işçiləri ilə əmək münasibətlərini rəsmiləşdirməyən müəssisələr vergi güzəştlərindən məhrum olunacaqlar. “Qanun layihəsinin mahiyyəti çox sadədir: yoxlama nəticəsində işçi heyətinin 10 faizindən və ya 100 nəfərindən çoxu qeyri-rəsmi şəkildə işlədiyi aşkara çıxarılan müəssisə üçün bütün vergi güzəştlərini ləğv etmək lazım gələcək. Qoy həmin müəssisə heç bir güzəştdən istifadə etmədən öz vergilərini adi qaydada ödəsin. Çünki vergi ödəməkdən yayınmaya şərait yaratmaq cəzasız qalmamalıdır”, – layihə müəllifi qeyd etmişdir.
Müxtəlif mənbələrin qiymətləndirmələrinə görə, hazırda Rusiya Federasiyasında 23 milyondan 35 milyon nəfərədək insan əmək münasibətlərini rəsmiləşdirmədən fəaliyyət göstərir ki, bunun sayəsində büdcə hər il 4 trilyon rubl (təxminən 117 milyon manat) vəsait itirir. Bu qanun pozuntusuna görə cərimə fiziki şəxslər üçün 5 min rubl (146 manat), hüquqi şəxslər üçünsə 50 min rubl (1460 manat) müəyyənləşdirilib.
Qanun layihəsinin hökumətin təsdiqindən sonra fevralın sonuna qədər Dövlət Dumasına təqdim ediləcəyi gözlənilir.
Mənbə: www.vergiler.az
ABŞ və Böyük Britaniya hökumətlərindən sonra Avstraliyanın da hakim dairələri iqtisadiyyatın artım tempini yüksəltmək və bunun üçün mənfəət vergisini azaltmaq planını gündəliyə gətirmişdir. Hökumət mənfəət vergisinin dərəcəsini 30 faizdən 2025-ci ilə qədər tədricən 25 faizə endirməyi planlaşdırır.
Rusiyanın Turizm Operatorları Assosiasiyasının məlumatına əsasən, 2018-ci il boyunca Yunanıstanın mehmanxanalarında və lisenziya almış apartamentlərində hər sutka üçün turist vergisi yığılacaq. Vergini ya əvvəlcədən, ya da mehmanxanada qalmaq müddəti başa çatandan sonra ödəmək mümkündür. Verginin məbləği isə mehmanxananın “ulduz” sayından asılıdır. “Beşulduz” mehmanxanada 1 nömrə üçün gündəlik verginin məbləği 4 avro, “dördulduz” mehmanxanada isə 3 avro, “üçulduz” nömrə üçünsə 1,5 avro müəyyənləşdirilmişdir. Aşağı kateqoriyalı qonaq yerlərində bir gecə qalmaq üçün 0,5 avro ödəmək lazım gəlir.